本嚟散戶對內地銀行股好樂觀，對建行（939）同工行（1398）更係情有獨鍾，覺得屬長線投資嘅心水股，只會有買貴，冇買錯，點知踏入08年，個市跌親，內地銀行股都跟住跌，噚日跌得仲甘，建行跌5.5%，收報6.15銀；工行跌6.3%，收報5.22銀，網友喺《香港討論區》話呢兩隻銀行股跌得「好crazy」。
網友chwo2046好猶豫咁話：「如果𠵱家沽會唔會中計？」皇金鷹有理冇理，一於好漢不吃眼前虧，覺得應該「先沽貨離場觀望，等轉勢再買番，最多係貴啲買番。但以𠵱家走勢睇，平啲買番嘅機會好似大啲。」
不過，kkf123就心有不甘，話：「死都唔放！坐就坐，有買貴冇買錯！最多放喺到發霉，我唔信升唔返上去。939目標價10.8元；1398嘅目標價係8.2元。」kenneth767同一陣線，話：「我要做清兵，心口有個勇字。」coraslam最樂觀，佢陰謀論咁話：「記得！當大家唔睇好嘅時候，正係基金入貨嘅時機。」