紐卡素球星祖爾巴頓（J巴頓）喺拆禮物日搞事，搞到要喺獄中過年，周四終於獲得保釋，本月16號要再出庭應訊。我求大俠聽個獄差老友講，呢位惡爺喺入邊慘無人道終日以淚洗面。哎！早知今日何必當初？
J巴頓喺利物浦嘅華頓監獄踎，佢入冊嗰陣，身上僅有嘅1,762鎊（約27,000港元）都俾當局代為保管，加上牢方規定犯人一個禮拜只可使15鎊，搞到呢位趴喺床度呻吟嘅中場硬漢好凄凉！點解？入到去冇錢招呼各路「好漢」，容乜易俾人溶咗㗎！
1星期慘得15鎊疏通
據講，佢入冊時，牢方已經下令唔準搞J巴頓，不過班人咁聽話嘅就唔會入去踎啦！於是，J巴頓俾人叫做「避孕套」，最慘係周薪5萬鎊嘅英超球星，居然俾社會下三爛鬧係「地球嘅渣滓」！風水輪流轉，加上人身安全受威脅，點會唔流馬尿呢？
不過，住雙人倉嘅J巴頓不愧係醒目仔，竟然好快諗計打破「一周15鎊」嘅規矩，狂買雪茄、雪糕、咖啡，送畀同倉友人同埋其他「好漢」。咁佢夜晚側身瞓喺1米闊嘅床上，都有人睇實個倉門，唔使驚有人搞佢啦！我求大俠提醒J巴頓出冊嗰陣千祈咪望番轉頭，亦希望佢明白球星唔係大晒，場內場外都要以禮待人。但係，除咗呢單之外，佢仲有幾單官非喺身，唔係我求大俠黑心咒佢，睇嚟真係有排佢受。
大儍飽受輸波壓力
話說回頭，J巴頓喺監獄入邊受苦受罪，出邊嘅紐卡素領隊「大儍」艾拿廸斯亦唔好過！尤其前晚0:2負曼城，已經係連續4場聯賽冇贏波，「大儍哥」賽後都承認壓力好大！睇嚟呢兩位苦主一見面，都可以唱番首《友誼之光》，抒發一下鬱悶嘅感受啦！