北京奧運好快嚟到，而2010世界盃外圍賽就爆發激戰，中國足協日前決定出重賞求成績。咁掌握內地人「人仔萬歲」嘅民情，唔怪得獲亞洲足協選為07年最佳足協啦！
肇俊哲：要殺出血路
據報道，如果國足贏到國際排名50位以上對手就打賞50萬，贏到50名以下的球隊獎30萬。取得世界盃外圍賽第1階段出線權有200萬，攞到2010世界盃出線權或者贏到奧運金牌，都可以分到800萬元！女足嘅奧運獎金亦唔差，8強100萬、4強200萬、冠軍800萬！
正喺廣州集訓嘅國足聽到後全部雙眼冒火、全身充滿能量，隊長肇俊哲好激動咁宣讀誓詞：「一切以集體利益為重，以出線世界盃為目標，誓死殺出一條血路，捍衞祖國榮譽！」我求大俠聽到後即刻同大陸記者朋友Q講：「踢波啫，唔使流血啩！」
阿Q吐一吐痰好不屑咁講：「你以為啦！班國足到時肯定發晒癲。」佢仲懶神秘咁講，上場熱身賽0:2不敵科特布斯場波，對方入波後聽到國足後備席有人大叫：「呢一腳踢走咗20萬啊！」
我求大俠細個踢波都好搏，不過唔係為咗贏波有汽水飲，而係享受團體合作嘅過程。希望國足們唔好被金錢蒙蔽，2月6日首場世盃外對伊拉克以平常心應付，話晒到時都係年三十晚，搏得滯暈低就唔好啦！踢波啫，唔一定要流血嘅！
實力唔係用錢谷得起
不過，咪話我求大俠唔撐自己人呀，睇怕足協啲獎金都可以慳番，因為國足嘅實力唔係用錢就谷得起，更何況，佢哋同組對手係澳洲、伊拉克同卡塔爾等強隊。國足及國奧總教練杜高域日前操練發爛渣，鬧班球員完全唔理解自己嘅戰術安排；之後兩位隊長肇俊哲同李瑋峰又沉迷打牌被罰1,000大元。咁嘅情況下出重賞，咪等同「對牛彈琴」！