舊年樓市暢旺，唔止地產代理搵得多，地產公司都冇忘記後勤一班員工，同佢哋分甘同味。四大代理行喺年尾先後再發放花紅，美聯話，有後勤員工全年可以攞到40個月糧，華華第一時間打探吓係邊位？實際講緊幾多錢？
點知美聯公關把嘴密不透風！唔係跑前線都攞40個月糧，呢位員工職位一定有番咁上下。既然「正常渠道」問唔到，就梗係喺非正式渠道索料，不過，連美聯內部員工都話想知係邊個，仲有人質疑，究竟有冇呢個人存在，吓，唔係吓嘩！
睇番資料，美聯未計第四季花紅，已經派咗7次花紅同賞金，差唔多相當於2.2個月人工，上個禮拜，美聯執董林鳳芳先講過話，照咁派法，好可能會有員工今年合共攞到40個月人工，等於3年幾糧，不過12月未埋數，未知有冇人攞到咁多。即係話，條數就係咁計，但實際總係會有誤差同意外嘅，明唔明！