賓架黃與中大同學何小姐讀書時已經拍拖，結婚三十年，請老友一齊慶祝，開一個小型派對。黃太先父係報界行尊，就係在華僑日報服務幾十年嘅總編輯何建章先生，上一輩報人無人不識。佢哋有兩位千金，皆留學美國，大小姐讀音樂，唱歌劇，二小姐在公關公司服務，兩位千金上台唱歌，一位唱「玫瑰玫瑰我愛你」，一位唱「I'llfollowhim」，咦，呢啲舊歌係兩位千金出世前三十年嘅流行曲喎，令城大教授Ｗ話：「乜咁似我哋在新亞讀書時開party咁嘅feel！」
主人家當然要領唱啦，賓架黃對住太太唱「沿途有你」，黃太望着老公唱「萬水千山總是情」，夠晒溫馨。最攞命嘅係黃太位老友JohnChow與港鐵Ｊ位千金合唱一首歌，送畀黃氏夫婦，就係「EndlessLove」，嘩，呢位阿John唔知邊度走出嚟喎，直情係張學友咁款，佢灌唱片我實會買，Ｊ千金亦似係久經訓練之輩，把聲柔到不得了，如果我係黃生黃太，一路聽，會甜到入心入肺。
唱完歌，要跳舞喇，賓架黃老友SimonLai將李克勤嗰首「舊歡如夢」改填歌詞，港鐵Ｊ勁band伴奏，黎公子Brian演唱，請黃生黃太跳chacha，歌詞有一句：「通街都讚黃桂林」夾音夾韻，全場吹雞歡呼之聲，可能朗豪坊酒店四十二層之下嘅上海街都聽得見。黎公子在東亞銀行服務，可惜東亞彭玉榮老兄嘅太太因為食咗海鮮而入院，雖然冇事出番嚟，彭生愛妻心切，臨時話唔嚟，聽唔到佢嘅夥計嘅美妙歌喉。
跳完舞，啲大班出場，幾位同期嘅華仁仔輪流上陣，本來華仁仔仲有袁天凡嘅。但適逢佢要在屋企招待芝加哥大學校長，唔嚟得，港大王副校長謙稱唔識唱歌，長實財務董事葉德銓着件黑色皮褸，一個箭步上台唱「Twist&Shout」，跟住嚟首「Isawherstandingthere」，舞池立即爆晒棚。佢嘅同班同學/有線電視一哥吳天海識做呀，跟住唱「LoveStory」與「Yesterday」，德意志銀行行長羅志偉話唱乜嘢好呢？左丁山高呼，唱「德銀窩輪啦！」Peter笑騎騎，嚟一首「沒有一天不想她」，一聽就知係另一Ｋ王駕到。