高清「開台」唔夠3日，政府已經收到投訴，問題千奇百怪，例如有人鬧高清畫面質素差，紅色好散；就連冇睇高清嘅住戶，亦發現電視訊號受干擾，鬼影頻頻出現！討論區上好多網友估計，除咗技術未成熟，仲好可能係高清盒有鑊氣所致；至於冇睇高清嘅朋友同樣受害，佢哋認為原因同大廈天線干擾有關。
網友似乎好有興趣討論市面上林林總總嘅機頂盒，有網站仲搞咗個我最喜愛機頂盒選舉。當中候選型號已多達10款，結果發現，原來最多人揀嘅係曾志偉嗰部「O」記ZMT-620FTA，有三成玩家都揀佢，而第二及第三名亦分別為PixelMagicMTV3000以及PicazzoM218。咁多人撐嘅原因，多數覺得佢夠穩定、唔易死機、唔易出現黑畫面。但係，亦有某啲牌子俾網友「插」到飛起，例如「T」字頭機頂盒，就有人批評時鐘會自己Delay，佢話：「一熄前面個掣，時鐘就行慢得好厲害……」更有人話呢款係OEM機，想有FirmwareUpdate都難。
買機頂盒固然要留意牌子，同埋最好有電訊局的合格標籤！唔少網友仲提醒用家，買前最好問清楚有冇得升級Firmware，因現時大部份機頂盒軟件未完善，鑊氣頻頻，如果有得更新Firmware，問題先可以解決。
討論網址： http://www.av100fun.com/viewtopic.php?t=79688