藍田陳先生推介安踏體育（2020），喺10.14蚊入貨，揸3至6個月。點解睇好？佢話：「跟沈大師買嘛，自己係沈大師嘅『粉絲』，早排佢喺電台話內需股安踏體育有得諗，咪跟大師入貨囉！」
$11.5有壓力 中長線冇問題
英皇證券研究部主管沈振盈表示：「你喺10.14蚊入貨遲咗啲噃，隻安踏體育我喺7、8蚊嗰時推介，𠵱家短期有阻力，喺11.5蚊位有壓力，可以守住10蚊位，如果股價跌穿10蚊，就弊啲，不過諗住中長線持有，就完全冇問題。同內地服裝商傾過偈，佢哋話內地市場需求強勁，即使多開分店，亦冇話分薄生意額，反映內地消費市場好大，幾睇好未來內需股。」
陳先生問：「咁家陣應該點做？」沈振盈表示：「如果炒短線，股價上到11蚊樓上，可以先走一轉，若果係中長線，捱得起嚟緊嘅震盪，可以繼續睇落去。」陳先生再問：「咁係咪11蚊走咗，股價跌番，可以再吸納？」沈振盈話：「冇錯，安踏體育可以長線持有。」
維達似貨源歸邊 有機炒上
孫柏文問：「咁安踏體育嘅目標價定幾多？有冇機會好似啲強勢股咁，上到廿幾三十蚊？」沈振盈話：「中線目標價15蚊。𠵱家買內需股，唔再講奧運概念，係講緊內地真係有好龐大嘅消費市場。」噚日安踏體收報10.8蚊，股價微跌0.4%。
沈振盈建議，可吼另一隻大陸內需股維達國際（3331），「話晒係大陸最大嘅紙巾同廁紙生產商，市場需求龐大，股價唔貴，市盈率低，家陣有迹象貨源已歸邊，嚟緊有機會炒上。」維達國際噚日收報4.05蚊，跌4%，較7月嘅7.28蚊高位，下挫44%。
建設銀行（939）
六行三保變高危股
大埔關公分享隻坐艇嘅建設銀行（939），佢話：「見隻建行高位回落，諗住有機會反彈，咪分注喺7.8蚊同6.8蚊入貨，點知越買越跌。」噚日建行再跌1.5%，收報6.51蚊，較10月尾8.97蚊高位，下挫27%。
沈振盈表示：「國內宏調，調高存款準備金率，息差收窄，限制未來一年借貸批核，種種政策已經令內地金融股全部跌緊，行業前景唔樂觀，從圖表睇，建行出現緊好靚嘅下跌浪，一級一級落緊，股價仲有下跌空間，跌到6蚊要止蝕亦有可能，唔好諗住再溝貨。」
沈振盈再講：「其實，以現時個勢嚟睇，每一下反彈就要走貨，等到落6蚊先走會太遲，記住要減磅，唔應該再溝貨，現時中資金融股不掂為妙，板塊變咗，六行三保都係高危股。」關公話：「之前啲人都仲睇好中資金融股，點諗到投資板塊轉咗啫！」
中國重汽（3808）
半新股 博追落後
屯門曾先生睇好中國重汽（3808），佢話：「近排半新股走勢唔錯，似追落後，反彈唔少，諗住中國重汽嘅前景應該唔錯，股價話晒仲喺招股價樓下。」曾先生早就身體力行，上市冇耐，就喺12.8蚊水平入貨，揸半年。噚日中國重汽開市後，一度急升3.8%，之後掉頭回落，收11.94蚊，跌1.5%。
沈振盈表示：「呢輪新股受到中國中鐵（390）股價上升推動，連升幾日，表現唔錯，連帶同期嘅半新股都被一窩蜂炒上，但近日開始見到股價出現壓力。嚟緊半新股嘅走勢，會睇番個別行業前景，估計中國重汽會喺現價先做一輪整固，記住，如果佢跌破11蚊，股價有機會再跌番低位。」
曾先生追問：「咁係咪升到13蚊先走？」沈振盈話：「可以暫時先走貨，因為你入貨價唔平，不過重汽有佢本身吸引嘅地方，話晒係內地『冧把溫』（numberone）嘅重型車頭生產商。」
華寶國際（336）
信名牌 睇好前景
銅鑼灣Frederick信名牌，話華寶國際（336）有大證券行睇好，「近日有幾間大行不約而同提高佢嘅盈利增長預測，睇好公司前景。佢主要係搞香精香料業務，幾實在，唔係再好似以前咁，搞科網咁虛無，咪推介下，考慮買入。」噚日華寶報7.81蚊，微升0.1%，股價過去一年已累升73%。
其實Frederick一早已經「跟隨」華寶，「早喺2000年就有入貨，當時仲係盧永仁話緊事，公司叫做網基科技時，喺5蚊買入，後尾股價一路跌一路溝貨，又十合一，跌到得番7仙時就沽晒；呢間公司咁多年改過六次名，之後俾大陸商人朱林瑤買咗六成幾股權，家陣股價上番七個幾。」
沈振盈就話：「佢主要係做香精香料，睇唔到盈利會有好大增長，𠵱家市盈率成39倍，股價亦累積升咗唔少，現時唔算太吸引，暫時都唔好掂住。」Frederick解釋，「只係對公司現時嘅大股東較有信心，佢唔會點干涉業務，放手畀管理層管理。」
今日嘉賓：敦沛金融投資研究部主管郭家耀
每日收市後4:30pm
歡迎Phonein28698262
http://appleactionews.com/features/finance/
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
*下午3時半開始，優先接受登記
