不經不覺，打《GT5P》Online對戰咗成個禮拜，起初十幾架車鬥食位、食氣流的確好刺激，就算我經常第一（倒數）都仍樂此不彼，輸完嗱嗱聲再片過；可惜鬥車熱情好快就冷卻咗落嚟，唔係隻Game唔好玩，有問題嘅係網上啲對手；首先係實在太多人鍾意玩碰碰車，尤其食完你氣流、爬過你後，硬係要用後半車身炒落你度，搞到你轉體720彈到無雷公咁遠，佢就安然無恙繼續疾飆，搜尋下一個獵物。撞你純粹為過癮，唔知仲以為玩緊《MotorStorm》定係《GT5P》街霸版！我對呢啲咁損人不利己嘅行為，已咒罵到無力，希望喺真實馬路唔會遇到呢啲人；另一邊惟有埋怨《GT5P》罰秒制度不夠完美，先有呢啲咁離譜嘅漏洞，就算啱啱更新多幾個賽事，我都已提不起興趣再入局俾人撞。
另一無品行為，就係包尾幾名提早斷線，第一圈都未跑完就唔見咗人，試過16人對戰，夠膽死臨尾剩得6架車衝終點，體育精神？幾錢斤？最慘係死爬爛衝，好辛苦先攞到第六位，點知排後面啲車一架一架咁消失，搞到最後按參賽人數計嘅獎金亦隨之扣減，唔㷫就假。若真係想《GT5P》發揚光大，SCE就要盡早開放自定房間對戰模式，起碼可將黑名單人物踢走，又可跟朋友以藍芽邊片車邊傾偈，先會叫人玩得投入，無謂俾害群之馬搞囗隻Game喇。
記者：徐影龍（對戰ID：dragonwilliam）