早幾晚，高明輝同思哲兄燒烤，打開報紙，見到有歌曲頒獎機構今年頒咗百幾個獎。
思哲見我睇得咁入神，問：「究竟今年邊個歌手最威？」我：「獎項濫發得咁交關，出現『太多獎項追逐太少好歌手』現象，令到啲獎項大幅貶值，都好難講邊個最威。如果畀我係主辦單位，一定會『收緊銀根』，停止濫發獎項，啲獎就馨香好多。」
咁啱得咁蹺，金手指孫柏文今日去咗論壇版支持共和黨總統參選人RonPaul，所以我決定搞番個金曲頒獎禮，表揚舊年網上發表嘅股票歌。同金手指頒獎禮一樣，都係貴精不貴多。好嘞，係時候開始。
最佳「財經演員」大獎
歌曲：月亮光光之全民炒股！
主唱：港男
http://www.youtube.com/watch?v=4nYjRTYaBFE&feature=related
由行性感路線嘅「財經演員」、自稱港男嘅網民自填自唱。佢最煞食嘅地方係，男主角全程MV赤膊上陣，再配合港女式「用手跳舞」，唱出佢炒股嘅心路歷程，相信全港冇幾多個「財經演員」可以學到佢。
最佳國語歌大獎
歌曲：死了都不賣
主唱：Amy
http://www.youtube.com/watch?v=6gbNJa7ILFU&feature=related
走實力路線，唱功好，不過呢啲都唔係得獎主因，得獎係因為佢貼中咗，做啱建議。呢首歌舊年五月放上Youtube，當時上海A股指數得四千幾點，到年底，升到五千五點。「唔賣」，中咗，所以得獎。
最佳燈神大獎
歌曲：放得太遲
主唱：東加豆
http://www.youtube.com/watch?v=bc2-_DKpQVg
改編自古巨基嘅《愛得太遲》，歌詞到位。不過，雖然條片十月十號貼上去，但係高明輝睇番片頭個錄音日期，發覺係舊年2月16號錄音，當時恒指二萬點左右，就話「放得太遲」？大家睇到呢度，相信都覺得佢得獎係實至名歸！
金手指網誌： http://phatdat.blogspot.com