07年對玩具業嚟講，可以話係當黑嘅一年，歐美國家對中國貿易磨擦嘅爭端，攞玩具業嚟祭旗，又話有毒、又話品質安全有問題，搞到全球對中國製造嘅玩具有陰影，加上美國次按危機，損害當地消費者購買力。喺咁多負面因素影響底下，香港玩具業界對07年表現都唔睇好，點知埋單計數竟然喜出望外，有3%增長，港商透過香港連內地出口嘅玩具產品總值達到1600億銀。
香港玩具廠商會常務副會長楊子江事後分析：「玩具係細路仔必需品，唔買佢哋會喊！」家陣父母視子女如珠如寶，其他可以慳，買玩具就唔會手軟。展望08年佢保持審慎樂觀，希望玩具出口保持3%增幅。
為咗重建國際市場對中國製造玩具嘅信心，下個禮拜日（1月6日），該會聯同香港玩具協會，趁灣仔會展舉行大型國際玩具展覽，喺尖東同時舉行首屆玩具節，推廣香港世界玩具之都嘅形象，當日下晝現場仲有免費玩具畀小朋友試玩。