噚日金價又創新高，一向有諗頭嘅恒豐金（870）主席林世榮，早喺舊年就話睇好今年首季金價會升到850至900美金。家吓既然金價到位，佢即刻把握良機，喺旗下一共重6噸嘅黃金展品，攞其中1噸黃金擺設放售。
千萬老鼠去荃灣
華華最關心嘅係連大哨朗拿度都參觀過嘅金廁所，仲有金觀音同「千萬金鼠」會唔會都拎出嚟賣？恒豐金行政總裁伍綺媚好肯定咁話，鼠年唔會咁快同「千萬老鼠」講拜拜，遲啲「千萬老鼠」仲會坐鎮荃灣分店。不過，佢就點都冇正面回應賣唔賣金廁所同金觀音，只係話就算賣都有排未到佢哋喎。今次賣嘅1噸黃金擺設，只係啲金枱金凳啫，估計套現2億銀。
不過，今次就唔同上次賣金馬車，上次架金馬車係原車出售（雖然又租番嚟做展品），可能啲金枱金凳號召力稍遜，所以佢哋會將批展品熔咗變金條，先賣出市場。伍綺媚話，林生當時喺介乎每盎斯400至600美金買入批金，家陣賣番出去，淨袋成億銀。又話，未來會逐步減持手頭黃金展品，每年大概減持1噸，總共會減持2至3噸，主要係金擺設，平均金價成本460美金。
唔再投資金展品
當年連金廁所都諗得出，好多人話林世榮夠諗頭，不過，遲吓大家就冇咁多精采黃金擺設睇喇。伍綺媚話，計劃將旗下幾個金展廳合併，將金廁所、金馬車、金觀音等放喺同一個展廳，希望上半年搞掂，日後唔會再投資金展品，未來主要發展中港兩地零售業務。𠵱家賣吓少件金馬車、賣吓又少咁張金枱，睇嚟大家都係要快手同啲金展品影相，賣一件少一件㗎喇！
另外，07年本港股樓皆旺，大家買嘢都零舍疏爽，一入工展會就見到嘅「金至尊」生意唔錯，伍綺媚話，生意額增長三成，喺聖誕同新年黃金檔期生意額更加理想，本港業務增長三成，內地業務增長更達到一倍，佢話公司內部定嘅全年目標仲要再高啲，唔知下年業績時交唔交到功課呢？
港股炒家轉戰場
除咗樓市大旺，金價亦越升越有。黃金成為搶手貨，醒目嘅投資者，舊年除了套股買樓，亦有唔少散戶由股市轉戰黃金市場。大福金業外滙及黃金董事施滄海話，舊年新開戶做倫敦金買賣嘅客仔當中，有兩至三成係新手炒家。
不過，講到炒金，香港投資者可能唔及大陸散戶咁熱情。話說，下個禮拜三，大陸同胞就有得炒黃金期貨，施滄海亦一早聽聞大陸嘅黃金熱，十足以前淘金熱一樣。佢話：「聖誕假期前同一位內地朋友傾偈，對方係內地投資公司嘅中介人，朋友講，就算未有黃金期貨，內地啲人已經炒黃金孖展，以前個朋友要主動call客，仲要上門同啲客開戶口，家陣？係啲客自己上門追住佢。」
施滄海仲話，香港嘅黃金熱早一兩年已開始，而且啲客冇咁瘋狂。不過喺大福，唔係話客人上門就一定受，佢話年屆60歲或以上嘅退休人士，佢哋多數唔敢接。
唔接唔係話歧視，只係為佢好，擔心退休人士冇收入，對黃金買賣或者孖展認識又唔深嘅話，風險太大啫。
大陸散戶又掀排隊潮
舊年華華睇大陸嘅網上討論區，成日見到嘅係散戶去股票行排隊開戶炒股，不過，今時唔同往日喇，內地人元旦假期一過，趕住去做嘅唔係開股票戶口，更加唔係搶油或者搶豬肉，而係排隊開黃金期貨戶口。
抽調人手應付人龍
下個禮拜三（1月9日）內地正式開放黃金期貨市場，前日先嚟個模擬交易，等一眾炒家試玩，剛啱今年內地黃金周縮減到得番三日，所以聽講話大陸嘅期貨公司出現等開期金戶口嘅人龍。
唔係華華老作，據《浙江在綫》報道，多人喺假期一完，第二日即刻跑去排隊開設期金戶口，成個手續搞妥要成粒鐘，所以好似浙江嘅新世紀期貨公司咁，要特別抽調多10個員工幫手，至應付到人龍。當然亦有唔少炒股老手，諗住轉換戰場。
大福金業施滄海話，大陸散戶喺股市賺到錢，但又驚政府再出招宏調，自然想搵個其他投資出路，加上中國人特別鍾意黃金，期金呢家嘢可以話嚟得及時，咪搞到大家㷫烚烚囉。
電郵：mailto:[email protected]
