華華以前聽過，有啲公司為鼓勵士氣，每朝早開工前會齊齊嗌吓口號，呢個傳聞唔知真定假，但新創建（659）有首企業主題曲就係真嘅，呢首06年推出嘅主題曲叫《創建新一天》，仲拍埋MV，個MV剛啱喺紐約第十屆國際QuestarAwards「企業－內部傳訊」類別攞到金獎。
評審團讚話意念創新又演出精采喎，咦，搵咗乜嘢人演出咁勁呢？原來係由歌星陳潔靈領唱，再加埋20位員工組成「新創建唱家班」，連一班集團董事及管理層，包括行政總裁陳錦靈及一班執董曾蔭培同黃國堅等，都有份上鏡開金口。而取景走勻香港會議展覽中心、協興建築負責興建的項目工地、新巴城巴車廠同車站、新渡輪、新世界中心、機場免稅店、大老山隧道等。