呢期睇得最密嘅宣傳片段，唔使講一定係介紹數碼高清節目！每日黃金時段不停播放，從《都市閒情》到《高清數碼睇》，講解咗好多數碼電視節目的基本概念，但係咪每家每戶都要買番部HDTV侍候？咁又未必。
其實現時可接收高清數碼訊號嘅地區仍然唔多，根據政府資料顯示，暫時只有九龍半島、香港島北部、沙田部份地區以及大嶼山東部嘅住戶先可率先體驗，但計計埋埋，都唔夠全港住戶一半！政府仲話，大概今年8月奧運前先可以覆蓋全港75%地區。另一個問題，就算你住喺有覆蓋範圍嘅地區，亦未必睇到！原因係所有大廈都必須安裝接收數碼廣播嘅天線，除部份新建樓宇外，其實大部份舊樓都可能未安裝，如果你想知自己睇唔睇到數碼電視，嗱嗱聲向業主立案法團或樓宇管理人查詢。
咁講到尾，我哋屋企收開模擬廣播訊號嗰部電視機幾時無得留低？政府話預計約莫2012年左右，視乎數碼廣播覆蓋率再作公佈。咁到時係咪要揼咗佢呢？都唔係嘅，如果佢仲精壯，都不妨留番嚟看門口專門煲碟用，好過又整多件電子垃圾呀，你話係咪？
政府網頁： http://www.digitaltv.gov.hk
TVB： http://digitaltv.tvb.com
ATV： http://app.hkatv.com/v3/digitalbroadcast/index.php