前日，《蘋果日報》頭版係一段題為「機管局高層嫁女、老千混入喜宴、百名賓客被騙財」嘅新聞。
報道話，幾名老千扮戥穿石同姊妹，喺上菜期間向10圍枱分發每圍12個利是封。叫賓客入錢，話玩抽獎，仲要話係「實有得中」。大家唔好誤會，啲老千話「實有得中」唔係用嚟勾起貪念，而係希望畀啲賓客一個「只係婚宴節目，唔係搵錢掠水」嘅感覺。
婚宴節目走火入魔
當時，有賓客問新老爺關於抽獎嘅嘢。佢答：「唔知喎，呢啲嘢都係啲後生仔同男家搞㗎啦！」最後，到食甜品時發覺還未開獎，先至知有過百賓客俾人呃咗。
孫柏文今日唔係想玩《警訊》，不過點解啲老千今次可以成功呃人？全因今時今日，啲新人嘅同輩喺策劃婚宴節目期間，已經走火入魔。
上個禮拜六，孫柏文走咗去做一位大學同學嘅戥穿石。之後嗰晚仲做婚宴嘅節目主持人。呢幾年嚟，我做過好多朋友婚宴嘅節目主持人，一向嘅態度都係，啲節目最好就係老少咸宜。一個29歲戥穿石覺得好好笑嘅環節，可能已經將男家奶奶嘅面，喺女家前落咗。所以我每次都係將婚宴當作為國家晚宴，新人嘅父母為兩國嘅元首。我就係一個佢哋唔熟悉嘅低級外交官。
一時娛樂禍延久遠
因為冇理由為咗一個29歲戥穿石嘅「娛樂」，為新人種下可以禍延幾十年關係嘅種子。所以大家做戥穿石同姊妹時，永遠記得當日主角係對新人同埋佢哋嘅家人，而唔係你。
金手指網誌： http://phatdat.blogspot.com