一家幾口的家居，有大人又有細路，設計當然以實用唔花巧為主，不過若是後生仔女搬出來獨居，設計上想有幾in幾潮幾大膽都得，一個人話晒事！今日來到這個一人之家，地方不算很大，但居室設計上就加入很多潮流元素，用色大膽，將屋企變成型人天地！
記者：葉雪芯
攝影：王文忠
Model：JoJo@Stagemodel
鳴謝：JackChong（60501126）
綠色點綴單調色彩
位於荔枝角的宇晴軒單位，一入屋，大膽的用色已令人眼前一亮，室內設計師Jack說，今次破格用了綠和黑、白、銀灰做主色調，比較少有：「屋主是個後生女，任職會計師，性格開朗且接受新事物，所以大膽用這類顏色作主色調。」屋主以「型」為主，顏色上用了大量黑、白、銀、灰色，但Jack認為這種monotone太男仔頭，所以提議用搶眼的綠做配襯，感覺較女性化。
客廳方面，最特別是電視組合櫃，加入幾何圖形元素，大玩線條，櫃框還營成一個弧形。由於單位面積只有六百多呎，Jack在梳化後的牆身上安裝一面黑玻璃鏡，營造伸延效果，令空間看來更大。此外，單位樓底夠晒高，足足有十呎，於是Jack就在選擇燈飾方面花了點心思：「因為樓底夠高，所以可用多點吊燈。全屋的燈，包括客飯兩廳、走廊、房門都是用鋼臂或銀色臂吊燈，營造hip風格。」
鞋櫃高到上天花
因屋主喜歡shopping，所以特別向Jack要求，設一個可儲存量大的鞋櫃，於是飯廳牆身上便加設了一個直通到天花板的高身鞋櫃，還在櫃面裝上黑玻璃鏡，將空間擴大。另外，Jack又在書房中加設一個大型衣櫃，櫃面用屋主提議的斑馬花紋：「純粹潮流元素，𠵱家興animalpack，而且斑馬紋的設計比較女性化。」唔好睇書房兩面牆都是櫃就以為只有收納功能，其實可以化身成睡房，只要從玻璃裝飾櫃拉下木板，就會變出一張床，方便客人度宿一宵！
地燈營造時裝店效果
主人房方面，亦是用了綠、黑為主色調。為求增強收納空間，Jack在睡房設了個打磨過的不銹鋼料地台，擺放雜物，還加設一盞地燈，照着衣櫃位置。「其實這個設計是參考一些時裝店和櫥窗，有啲高級時裝店的地台都會加光管地燈或射燈，射上衣服，造成舞台或spotlight效果，所以如果每次打開衣櫃都有在時裝店揀衫的感覺，女仔應該幾開心。晚上這盞地燈亦可變成夜明燈，幾實用㗎。」
