參加完黃桂林夫婦結婚三十周年晚會，享受一晚歡樂之餘，次早打開報紙，見巴基斯坦政府為貝娜齊爾之死，三改死因，巴基斯坦全國暴亂不止，不禁慶幸我哋生活在香港，身在福中。貝娜齊爾出身名門，天資過人，縱橫哈佛牛津，如果佢係印度人，相信際遇會更好啲。唔少人認為英國人離開殖民地前，大搞陰謀，將印度次大陸分為印巴兩國。事隔近六十年，再睇番轉頭，英國人與甘地實在高瞻遠矚，英明蓋世。如果唔係嘅話，回教徒與印度教徒在次大陸紛爭不斷，國不成國，南亞局勢更壞。𠵱家自巴基斯坦分開去嘅孟加拉冇事，印度十分穩定，經濟發展直迫中國，只係巴基斯坦動盪不安，印度人要好多謝英國佬，好多謝甘地。
生為才女而係回教徒，思想上不知如何調和思想。例如沙特阿拉伯一位女士被人強姦，告上法庭，女士被判受刑打百幾藤，直到「麻煩友」世界警察，專門干預外國事務嘅美國佬出到聲，呢位女士先至得到沙特皇下令特赦，面對呢啲案例，回教徒才女不知如何向西方人、東方人解釋佢哋嘅法律邏輯？
為貝娜齊爾哀痛之餘，不能不佩服日本人之反省力。《亞洲周刊》報道，日本人每年選一漢字（年度漢字），反映當年日本社會世態，今年徵集咗九萬幾張明信片，各提一字，前五名係「偽」、「食」、「噓」（謊言）、疑（懷疑）、謝（謝罪道歉），充份顯示日本人在二○○七年對本國食品安全，老牌子作假，三百年老舖做假生產日期等事故之痛心疾首。京都名寺「清水寺」住持森清范大和尚親自在大宣紙上揮毫寫下一平方米之「偽」字，震撼日本人心。
日本政客對於中國戰爭，死不痛心反省。但日本人民選出一個「偽」字嚟表達喺07年日本名牌捨棄信譽謀取利潤之悲痛，則令人感動。如果我哋要選一個漢字來反映二○○七年中國與香港之世態，會選出乜字呢？大熱門相信係「炒」，其次係「貪」、「吵」，台灣就加多一個「詭」字。