07年股市旺，樓市更旺，有地產代理話，啲客買樓十足97年咁。過咗幾年寒冬嘅地產代理，08年終於可以過肥年。華華噚日同兩位行內TopSales傾偈，大家經歷過咁多起跌，今年賺番唔少，有人見過鬼怕黑，唔敢再將啲錢買樓，但亦有人對樓市信心不死，繼續投資。
美聯（1200）TopSales莊蕙殷（Polly）同中原梁惠湞（Becky）都話今年佣金和味，實際𢭃幾多唔方便講，以各自幫公司搵到2000萬以上佣金計，點都有幾百萬落袋。
買寶馬獎勵自己
Polly話，今年最大一宗生意，係促成深水灣香島道33號成交，單刁講緊嘅成交額達兩億銀，係佢做過單一最大宗交易。金額大還大，但令Polly印象最深刻嘅要數中半山富滙豪庭一戰。講開呢個盤，有傳發展商恒地（012）嘅主席，李四叔都留咗兩個單位送畀親家徐子淇父母。個盤Polly由寶雲道跑落中環IFC做買賣，最後一日賣咗6個單位，成交額合共三億五銀。
既然今年賺到咁多，有乜獎勵自己呢？佢話臨年尾買咗部寶馬，另外就投資退休基金，「試過97年買樓收租，最後蝕唔少，所以怕怕。」咁起碼有部靚車，唔使再「轆」落山跑數。
舊年冇放過假
至於中原Becky最深刻嘅一次，係貝沙灣一宗以1.44億成交嘅生意，因為喺交易過程中，業主不停反價，個買家又竟然追住要，由最初1.3億銀，簽約時買家叫高話要1.33億銀，到畀票時就變成1.44億，搞到佢兩頭騰，仲要跑上深圳搵個業主簽約。
Becky話舊年冇放過假，但幫公司搵咗2100萬佣金，佢自己分到幾多就唔肯講，但應該唔少，仲破咗97年嘅營業額。Becky話07年同97年樓市有啲唔同，買家實際咗，用家較多，唔少大陸同東南亞商人想喺香港置業，當做後勤總部，唔少租客變業主，所以覺得個市實淨啲，冇泡沫咁話。
電郵：mailto:[email protected]