金價噚日再創新高,西貢Michael乘勢推介靈寶黃金(3330),話可以喺現價4.98蚊入貨,目標價6蚊,揸3個月,睇升兩成。靈寶黃金噚日上晝走勢偏軟,但晏晝股價急升,一度高見5.1蚊,收報4.98蚊,升8.7%。
少金礦 多中游業務
Michael非常睇好靈寶黃金,佢話:「睇淡美元,要一注獨贏買黃金,家陣靈寶股價比另外兩隻黃金股招金礦業(1818)同紫金礦業(2899)為低,有機會追落後。」招金同紫金噚日分別收報34.6蚊同12.54蚊,升5%及1.8%。
孫柏文提醒Michael:「靈寶黃金係從事中游業務,唔係採金,冇乜金礦嗰噃!」
金價升 反拖累盈利
敦沛金融研究部主管郭家耀亦指:「佢其實係黃金價格上升嘅受害者,金價急升,會增加買金嘅成本,拖累盈利,佢中期業績就曾發出過盈警,如果博金價上升,倒不如直接買金礦股招金同紫金,勝算較靈寶高好多。」
不過,Michael擔心,「之前招金同紫金已經升咗好多,風險大啲啫。」孫柏文解釋:「你要搞清採金同煉金嘅分別,靈寶黃金主要係提煉黃金,原材料價格上升,會拖低毛利率,金價由9月開始不斷攀升,靈寶股價就係咁跌,所以千祈唔好見到有黃金兩個字,就當金礦股買。」
郭家耀補充:「雖然招金嘅預測市盈率有成30幾倍,幾貴,但如果08年金價仲不斷咁上,盈利增長可以降低市盈率,支持股價,相反,靈寶黃金就望天打卦,盈利冇乜保證。」
Michael建議
建議買入價:現價$4.98
目標價:$6
止蝕價:$4
時間:3個月
錦江酒店(2006)
奧運概念 宜炒短線
大埔關公推介錦江酒店(2006),佢10月喺3.4蚊買入,目標價5蚊,止蝕價3蚊,揸一年。關公話錦江係奧運概念股,前日躋身二十大升幅,成交仲超過兩億,所以睇好。
郭家耀話:「錦江做嘅係經濟型酒店,面對嘅競爭比較大,炒奧運概念嘅話,短線睇半年都可以考慮,唔值得作中長線持有。」關公強調奧運概念值得睇好,郭家耀再講,「睇公司嘅盈利,係睇好長嘅timeframe,奧運始終係一次性,如果一次過對公司盈利造好,短期係有幫助,但長線始終令人擔心,如果錦江維持做經濟型酒店,競爭優勢唔係咁明顯。」
不過,關公繼續唱好:「好多國內股都跌穿100天平均線,但錦江仲守得住。」郭家耀惟有提醒佢,「呢個同炒作內需、奧運概念股有關,不過要留意,始終係一種『概念』,無實質盈利支持上升,呢類股唔算係長期嘅核心組合,目標價5蚊定得太過進取,4.5蚊較為合理。」
第一太平(142)
新興市場潛力大
西貢黃先生推介洋行股第一太平(142),建議喺5.5蚊買入,目標價6.5蚊,睇升18%,止蝕價5蚊。揀呢隻較冷門嘅股,黃先生當然有原因,「呢隻係綜合洋行股,公司上半年業績幾好,業務主要喺菲律賓同印尼嘅新興市場,有增長前景。好似佢間附屬公司菲律賓長途電話,客戶同盈利都有上升,而印尼Indofood嘅盈利又唔錯,相信未來升幅潛力,可能比其他洋行股高。」
可短炒波幅 不宜長揸
郭家耀表示:「第一太平比較低調,較少投資者認識,公司股價波幅較細,目標價定得都合理,但現時睇唔到盈利會有大幅增長空間,可以短炒波幅,唔適合長揸。」黃先生唔同意,堅持自己嘅觀點,睇好第一太平,「佢持有菲律賓長途電話,係當地最大電訊商,家陣仲未發展3G,相信未來潛力好大。」
不過,既然專家唔睇好,黃先生亦做足兩手準備,佢問:「如果唔揀第一太平,仲有邊隻洋行股吸引吖?」郭家耀話:「自己唔鍾意洋行股,喜歡業務較單一嘅股票,睇好邊個業務,就會直接買嗰個行業最好嘅股票。洋行股實在太多瓣數,唔係個個業務都會掂,好似和黃(013)咁,佢搞港口業務有聲有色,但受3G拖累,影響股價。」
第一太平股價噚日雖然跟大市跌,收報5.87蚊,下跌2%,但一年嘅累積升幅其實已超過四成。
今日嘉賓:亨達集團研究部董事黃敏碩
想搵名家教路,請登入以下網址
http://appledaily.atnext.com/jp/finance登記
歡迎Phonein28698262
每日收市後4:30pm
http://appleactionews.com/features/finance/
成功參與節目者,有機會獲贈禮品,登記成為「Webcam之友」,更有機會獲得(aastocks)即時報價賬戶
*下午3時半開始,優先接受登記