草蜢、楊思琦、陳敏之同黃長興，前晚一齊出席將軍澳東港城舉行嘅「極速飛輪」08倒數夜，吸引逾千市民圍觀。
蔡一智前晚仲帶埋太太周雪芳嚟倒數，蘇志威就同劉小慧以及兩個女一家四口出席，場面溫馨。思琦嘅父母雖然都有嚟撐場，但就偏偏唔見思琦男友李永豪出現。
前晚除咗有美國特技團表演雜技，同草蜢嘅勁歌熱舞之外，思琦亦有同黃長興大跳拉丁舞，睇到觀眾熱血沸騰。
即刻抹嘴
不過，黃長興同思琦跳舞期間，隻手差啲掂到思琦嘅胸部，之後佢哋玩遊戲用嘴仔傳紫菜時，黃長興仲差啲掂到思琦嘴唇。玩完之後黃長興即刻抹嘴，仲猛話好尷尬，好在當時李永豪唔喺度，否則可能睇到眼火爆都唔定。
最近有傳黃長興為咗襯得起女友曹敏莉而搬屋，但前晚黃長興就否認此事，佢話：「唔關事，我住香港，日日過海好貴好攰㗎！」講到新年願望，草蜢就話：「希望今年可以開到100場演唱會啦！」
