韓國奀星李大鶴上年11月宣佈做咗變性手術，變成真女人，震驚當地演藝界。不過，呢單新聞無助佢有份演出嘅電影《我班friend好搞嘢2》嘅票房，令大家遺忘有呢個變性藝人存在。最近李大鶴終於宣佈會簽新經理人公司，仲揚言要做河利秀第二，網友都非常支持佢。
七分面漂亮
阿Deep同好多網友都好想知道李大鶴𠵱家有幾靚，最近終於喺韓國empas討論區度見幾張佢嘅近照，唔講清楚，就真係以為佢天生就係女人。網友scutie話：「佢比河利秀仲靚喎。」inesshell就鼓勵李大鶴要加油，話等睇佢嘅演出喎。冇韓國網友留言笑佢或者中傷佢，可能同佢早排接受訪問時講過：「我中學時好憎自己係男仔，曾經打算自殺了結，但最後都係想繼續活下去，所以決定做變性手術。」
睇李大鶴嘅近照，發覺佢的確好貪靚，經常以七分面或側面上鏡影相。不過阿Deep認為如果佢真係要成為出色嘅演員，應該勇敢啲俾人睇清楚全相，始終拍戲時唔會淨係拍佢左邊面嘛。
版主：網盜王尊尼Deep
本欄逢周一至五刊出
網址： http://news.empas.com/board/bbs/read.html?b=star&a=174011