踏入2008年，北京奧運係頭號盛事，所以一到08年首個交易日，個市就炒定啲奧運概念股，例如錦江酒店（2006）上市以來未炒過咁滯，一炒就升14%，不過翻查其股價往績，每每出現一支大陽燭之後，買盤就無以為繼，高追提防中伏。
華創要長期昅實
北京北辰（588）升12%，呢隻北京地產股係有北京概念，但係諗落受惠奧運唔太鮮明，似乎係炒股價落後較多。有北京兩個字的北京時裝（761）都升11%，呢隻就似乎無厘頭咗少少。
要搵真正北京奧運受惠股，其實應該從消費及零售角度出發，始終外來遊客激增，消費行業第一時間受惠。以往每逢世界盃、奧運，市場都會追捧電視股，因為更換電視需求會大增，此類股份值得密切留意，待相關股份成交大增時，可追入短炒，創維（751）、TCL多媒體（1070）雖然暫未有勢，昅實亦無妨。
另一類係啤酒股，外國人啤酒當汽水飲係人都知，相信奧運期間朋友相聚點都會開多兩支啤酒。睇圖表，青島啤（168）同金威啤酒（124）走勢都唔錯，再揀多隻，華潤創業（291）都有啤酒業務，兼且轉型後全情投入國內消費零售業，食正國內消費股熱潮，係今年長期留意對象之一。
工商銀行（1398）日前宣佈，以19.2億港元從比利時富通集團手中收購工銀亞洲（349）8.23%的股權，有關交易昨日已出現於交易所SDI紀錄。收購完成後，工行持工銀亞洲將從62.98%提高到71.21%，交易價為每股19.23元。
工銀亞洲宜長揸
摩根士丹利認為，工行此舉是為了私有化工銀亞洲鋪路，但工行重申暫無此意，摩根士丹利給予工銀亞洲增持評級，目標價25元。該行指出，工銀亞洲的基本因素強勁，若港股直通車開通，將成為最大受益者之一。
其實即使無直通車，工銀亞洲都絕對係一隻落後銀行股，缺點係走勢沉悶，只宜長線持有。