新一年好多人都會有好多新計劃，敏妮首先要做嘅係換個新網址，等大家可以同敏妮網上溝通。其實敏妮開blog宗旨係，借住呢個小小「地盤」，同大家一齊討論搵錢心得。之前，敏妮blog有技術問題，大家鋪唔到意見上去，但敏妮仍然喺其他渠道收到讀者嘅意見同問題，其中有個讀者問有關MPF嘅問題。
舊年經濟好，讀者D俾人挖角，佢sent咗個email畀敏妮，問舊公司份強積金應該點處理？好多人都知，轉工後，原先喺舊公司份強積金有3個處理方法：（一）最簡單係帶埋過去新公司；（二）用番舊公司嘅強積金計劃；（三）自己喺市場上揀過一個強積金計劃。如果揀（二）同（三），就要開個保留賬戶，至於實際運作，搵你個強積金受託人自然會幫你搞掂。
問題係，3個方法應該揀邊種？睇強積金受託人表現。舊年尾一啲強積金研究公司已經出晒成績表，幫強積金成份基金計數，舊年股市旺，尤其亞太區股票基金更加大豐收，但同樣買股票基金，有啲積金受託人特別標青，有啲表現只係一般。
過份取進要小心
打工仔唔轉工，幫襯邊家受託人暫時冇權揀，但難得轉工，以前供落份MPF可以自己揀，放喺個好啲嘅受託人度等佢滾存。如果舊公司用開嗰間成績名列前茅，咁就梗係喺佢度開個保留賬戶啦；如果新公司同舊公司用嘅受託人都成績麻麻，就自己喺市面搵。不過，敏妮見過某家強積金受託人為咗爭取高回報，揀股都幾進取，呢個世界冇長勝將軍，使唔使博到咁盡，自己衡量嘞。
綜合各保留賬戶
讀者D唔係第一次轉工，一早已經有一個保留賬戶，即係話今次轉工又多一個保留賬戶，敏妮建議佢一次過集合兩個保留賬戶。你以為分3個戶口可以平衡風險？但多一個賬戶，就多一分成本。
網誌： http://wanmanil.com/blogs/