農曆新年睇生肖運程，新曆新年梗要搞啲洋化嘢，玩完塔羅牌，唔少得講星座運程。原來唔少高官富豪都係處女座，包括政務司司長唐英年、金管局總裁任志剛、彤叔鄭裕彤，同埋九倉（004）吳光正。
華華問過Jupiter幾個富豪今年嘅星座運程，佢話處女座嘅彤叔今年土星入命宮，做嘢會謹慎啲，所以今年投資會穩陣為上，甚至會收縮同精簡投資。要跟富豪入股，彤叔可能最跟得過。彤叔一向係穩陣派，舊年老友李四叔大舉入市，彤叔都係睇定先跟，係就係冇四叔咁威風八面，但小心駛得萬年船。
至於彤叔老友四叔，係雙魚座，今年會受天王星影響，較多心血來潮嘅投資，不過，由於同時受土星影響，投資時會猶豫不定，公司股價亦會較波動。各位散戶要跟四叔，都係睇定啲好。
賭王收入來源增
人馬座嘅賭王何鴻燊，今年木星入財帛宮，會有唔同嘅收入來源，但對投資過度樂觀，好容易使大咗，未必積到財。舊年賭王唔止賭業王國俾人蠶食，連港澳客運都差啲要同人分，好彩女兒何超瓊同美高梅合作嘅賭場開幕，乖仔何猷龍已具小賭王風範，賭王大可以專心迎戰老外。
獅子座嘅超人李嘉誠，今年土星入財帛宮，對錢好小心謹慎，唔會冒進，亦會縮減投資。至於超人同天蠍座嘅細仔李澤楷父子關係，今年上半年會冇咁緊張，但下半年就會轉差，涉及錢銀或者價值觀，之前未解決嘅問題，會再度爆發。咦，唔知係咪同電盈（008）網通（906）爭拗白熱化有關呢呵？
名人星座表
李兆基
出生日期：3月06日 星座：雙魚座
李嘉誠
出生日期：7月29日 星座：獅子座
鄭裕彤
出生日期：8月26日 星座：處女座
吳光正
出生日期：9月05日 星座：處女座
唐英年
出生日期：9月06日 星座：處女座
任志剛
出生日期：9月09日 星座：處女座
郭鶴年
出生日期：10月06日 星座：天秤座
李澤楷
出生日期：11月08日 星座：天蠍座
邵逸夫
出生日期：11月19日 星座：天蠍座
何鴻燊
出生日期：11月25日 星座：人馬座
胡應湘
出生日期：12月03日 星座：人馬座
資料來源：本報資料室
今年星座投資運程
白羊座
理財投資：股票、基金及物業會有進賬，忌衝動
投資工具：長期投資較有利，股票及基金皆宜
金牛座
理財投資：上半年不宜大筆投資，下半年運勢較佳
投資工具：債券及定存較穩陣，下半年可投資股票
雙子座
理財投資：運勢不佳，投資要謹慎，不要與他人合夥投資
投資工具：避免風險，首選定存投資
巨蟹座
理財投資：運勢不理想，容易受到四周氣氛影響
投資工具：下半年可找理財專家定投資計劃
獅子座
理財投資：上半年財運不俗，9月後收入較波動
投資工具：可考慮長線投資基金，但不宜大注
處女座
理財投資：維持去年運勢，10月後，投資回報更豐厚
投資工具：長線目標投資股票及基金
天秤座
理財投資：今年財運不及去年，但整體還過得去
投資工具：靠積極理財，冀資產勝去年
天蠍座
理財投資：上半年運勢不佳，易坐艇；下半年好轉，仍要審慎
投資工具：上半年宜定存，下半年小注買基金或股票
人馬座
理財投資：投資運弱，容易坐艇或損手，外圍環境左右投資
投資工具：定存較合適
山羊座
理財投資：財運穩定，保持理智投資
投資工具：投資股票及信託基金
水瓶座
理財投資：上半年有斬獲，見好要收；下半年不理想，宜保守
投資工具：股票最有機會
雙魚座
理財投資：上半年食白果，下半年則有可觀進賬，投資忌瘋狂
投資工具：可嘗試股票或期貨，宜下半年才出手
資料來源： http://www.12xingzuo.net/yunceng/
