呢排最熱門嘅話題之一，當然係數碼電視廣播開鑼啦，小妹雖然對呢啲新科技冇乜認識，但周圍啲friend頻頻話要提升大廈嘅公共天線又係錢，買個機頂盒又係錢，呻到小妹都煩晒。
畫面有標清水準
小妹噚日同亞洲高清協會幹事Alan傾開，佢話𠵱家有一種慳皮嘅方法唔使全面提升大廈嘅公共天線，但係可以收到數碼台，仲唔使每戶裝機頂盒㖭，就可以同鬼影、雪花講byebye。
佢解釋話，太過技術性嘅嘢小妹唔會明，簡單嚟講只係喺大廈公共天線加裝數碼廣播機頂盒，有幾多個數碼台，就用幾多個嘅機頂盒，接收晒數碼訊號，然後再將訊號轉為模擬訊號入屋，「因為係用模擬訊號入屋，當然睇唔到高清嘅解像度，但有標清嘅水平，最大好處係用機頂盒接收訊號，唔會有雪花、鬼影；加上唔係全面提升天線系統，費用大大減低。」Alan話，一啲過去電視畫面鬼影幢幢嘅舊區大廈最啱，平平哋就掃走鬼影、雪花。
逢周一至周四刊出