周星馳新戲萬眾期待，因香港人對喜劇餓了太耐。王晶屎尿屁、無厘頭早已封塵，鄭中基上不了桌面。憑良心，周星馳自《少林足球》起要國際化，大幅減少廣東Gag，香港人睇，少了過癮也少了親切感。原來喺香港，真係想笑都難；子華的棟篤笑撲唔到飛，發現旁邊有套《一篤戲》，由劇界不老不少3個人，各自一齣獨腳戲集結成戲，用240磅脂肪、榕樹腳、近乎瘋狂的腦汁同你講：笑人請先笑自己、唔帶腦睇唔受你。
記者：馮冠芝
攝影：梁細權、陳盛臣
鳴謝：HairPeace
我X故我在
近年港產笑片非常爛，喜劇笑匠無人接棒。劇壇正好相反，大把出色喜劇演員任你揀。07年的《一篤戲》，11個演員分4日轟炸你。今次翻篤，精選白只、楊詩敏、翟凱泰（泰臣）3人獨腳戲，據聞呢3位篤戲觀眾睇得最嘖嘖稱奇，加上另外8位無期。泰臣話：「主腦甄詠蓓貪我哋係撈偏喜劇演員，個性夠怪獸。」你唔講我自己找，發現3人都令觀眾對「喜劇」重新思考。柯南Mode啓動，睇睇3位點解有得留低。
白只 戲謔240
07年露得最多肉的公眾人物，係白只唔係Freeze，因為3女未夠斤両！240磅郁到又識做劇的白只，在劇界絕對屬「金牌」級。露起嚟啖啖真肉，好過6個違反地心吸力的假球。君不見在旺角行人專用區地上，有幅約2×2米，朱凌凌5子仿湯唯裸背示人，即便當中疑兇白只可能因PatPat凹凸，被港鐵拒落廣告嫌核突，但我企喺他股上感覺踏實！
《愛脂》：我Fat故我在
今次《愛脂》又一次露點上陣，唔止海報，演出更會除衫兼度身，同大家講眼見唔係事實，要愛自己先要識自己。「除唔除衫唔係話題，我從來唔介意，你話我肥，我套劇就用數據話你聽點叫肥。我度到自己46吋腰，然後你認為好瘦嘅人，原來佢條腰都32吋啦！所以眼見嘅可以好荒謬，而用眼見鏡中嘅自己去釐定自己有問題，就更荒謬！」
30分鐘內要表達對身上脂肪的愛，白只選擇面試，主考官係上帝，問了一抽問題，上帝派速遞員送了一盒禮物予白只，係脂肪！唔係道具，真真正正喺街市豬肉佬中，用20蚊買下整隻豬背脂肪！速遞員肉騰騰的錯誤，令劇中白只誤以為上帝戲謔他為脂肪，其實唔係上帝笑佢，係佢先笑自己。自虐的戲謔，就是白只對喜劇的定義，「喜劇係好慘！我笑自己唔係因為我夠自信，如果我真人唔着衫落旺角，100個途人指住我話我死肥仔，我都會受傷，會痛。但我接受自己，因為痛，所以知道咩係快樂；將痛楚化為笑自己，比起笑人更有內涵。」
除非Paco捧我做多肥
咦？開始走調！無論套劇定訪問，笑笑吓開始痛？終於明白演Mr.Bean的RowanAtkinson何解是個抑鬱症病人。講到底，240磅脂肪，是包袱？是寄託？「若有日Paco走嚟同我講：『朱凌凌我睇好你哋！你都知我好Open，連小肥都Buy，不過呢件肥仔多肥，少啲肥得唔得呀？』咁我可能會減！」講就咁講，但聲演上帝、朱凌凌拍檔大佬把聲從天而降大踢爆：「但你噚日話如果你瘦到得百六磅，你家人會問你第幾期，唔係供樓，係癌症！」說着，白只已跟侍應叫第二碟海南雞飯！
翟凱泰 獨樂樂
人生苦短，在於用1/3時間睡覺之餘，更花了無盡時間去等：等車等加人工等飲茶，泰臣等睇醫生等出果皮──
《等待果皮》：我呆故我在
「某日我等睇醫生，手中無雜誌無書，對住四面牆，呆坐中腦袋啓航最古靈精怪的Idea。」所以《等》就係講一個人在等待時腦中的發白日夢。話明幻想，舞台上亦只有2張凳，讓觀眾幻想泰臣的幻想！用叫人拍案叫絕的口技做領航，帶你進入戰地、墳墓、蜘蛛俠等世界，想笑，請先開啓腦袋發揮想像力，「當你想像到我想像的情景，你係因為你的想像而笑。」用舞台將獨樂樂變為眾樂樂，難怪能翻篤。
楊詩敏 胖腳，錫！
白只講全身，楊詩敏（蝦頭）局部講隻腳，「由細到大，我成日都被人話隻腳粗！『大象腳』、『樹幹』、『甲組腳』聽唔少！每次一聽見，內心那股女仔的感覺，就會毀於一旦！」
《奶神宿命6絕代金華火腿》：我粗故我在
由腳開始，蝦頭創作了這故事，其實係借「腳」發揮，要觀眾在笑聲中反問咩係真正美麗！蝦頭在演這劇的過程中找到了更一石二鳥的「瘦腳」法！「其實一路以嚟我都有少少介意自己隻腳比其他人粗，但上次演出，當我毫無保留露出條腿，觀眾竟然話：『唔係好粗』！原來當我自己突破他人看法時，更會改變他人看法。」
同白只一樣，蝦頭覺得要笑人先笑自己，「喜劇背後，可以好苦澀！我被人笑腿粗，在我個人而言一啲都唔好笑。但當我識得笑番自己，其實已是另一個階段。」短劇載歌載舞，歌頌胖腳不是絆腳石，而是胖腳，錫！
《一篤戲Encore》送飛！
想有個用腦先笑到、笑中有苦澀的初體驗？現「劇場組合」送出《一篤戲Encore》戲票，有興趣者請連同回郵信封來信致：將軍澳工業邨西駿盈街8號《蘋果日報》副刊「OneFineDay」收（註明索取《一篤戲Encore》戲票，並於信封底寫上姓名及聯絡電話）名額10位，每人2張，先到先得。
日期：17-20/1（7:30pm）
地點：香港藝術中心壽臣劇院
票價：$140
查詢：25110139