昨日同大家介紹過今年有機會到港嘅日製新車後，今日就輪到歐洲車；佢哋同樣以高性能跑車為主，當中配備6.2V8引擎，兼可輸出475匹馬力嘅Mercedes-BenzC63AMG至為矚目，加上109萬嘅售價，似乎誓要將份屬同鄉嘅BMWM3打敗！
記者：鄭達基
Mercedes-BenzC63AMG
火併同鄉死敵
自從喺去年嘅法蘭克福車展亮相後，就一直俾車迷視為係BMWM3死敵嘅Mercedes-BenzC63AMG，佢雖然起用原來C-Class外觀，但喺AMG操刀下，就加咗全車包圍，連胎軨都換埋做18或19吋，令佢賣相變得更具高性能跑車氣息。
車廂採用咗相近嘅概念，除咗喺中控台部份加裝金屬裝飾之外，就連座椅都換埋做AMG嘅桶形出品；另外，收藏喺引擎蓋下嘅一台6.2公升V8引擎，喺AMG改良之後，馬力及扭力輸出分別達457hp/6,800rpm同600Nm/5,000rpm，比起對手嘅420匹仲要高出一截！
預計3月到港、約109萬
期待指數：★★★★★
AudiRS6Avant
辣爆勁旅
一直成為車迷追捧對象嘅AudiRS車系，喺去年又有全新嘅RS6登場，用Avant旅行車款式同Fans見面嘅佢，除用咗超大尺碼嘅跑車胎軨，同埋雙出式尾喉之餘，車廂陳設亦都一樣力Sell跑味，當中更不乏有Recaro跑車桶椅。至於機械配搭方面，廠方就幫佢安排咗一台5.0公升V10TFSI引擎，喺Turbo裝置嘅輔助下，最大馬力可去到580匹，而扭力更達66.2kgm/1,500-6,250rpm，表現令人期待。
預計5月到港、約185萬
期待指數：★★★★★
ClioRenaultSportR27
終於等到了
自從RenaultClio消失於香港車壇之後，唔少Fans都好想佢快啲返嚟；最近終於有好消息傳出，代理話有機會喺年中前，引入最頂級嘅ClioRenaultSportR27。內外有跑車化配備嘅佢，所配用嘅引擎係一台2.0公升直4型號，馬力可以去到197匹，0至100km/h都只係6.9秒咋！
預計5月到港、約31萬
期待指數：★★★★★
Porsche911GT2
530匹狂飆
為咗等車迷可以有揸賽車嘅感覺，所以Porsche繼911Turbo之後，再推出GT2型號。千祈唔好睇佢外表好似好普通，但原來入面有好多具備賽車基因嘅配備，例如PASM跑車懸掛等等，當然可炮製出530匹驚人馬力嘅3.6公升水平對向六汽缸引擎，肯定會係車迷嘅焦點所在啦！
預計9月到港、約350萬
期待指數：★★★★★
Mercedes-BenzSLK
跑格賣相型更多
Mercedes-Benz喺07年完結前，都趕住推出新一代SLK嚟同大家見面；新車嘅改動主要集中喺車首部份，其中泵把同鬼面罩嘅設計，睇落同當年嘅SLR、又或者同F1跑車頗相似。入門嘅SLK200Kompressor，馬力會被提升至184匹，完全切合跑車嘅基本要求。
預計10月到港、約55萬起
期待指數：★★★★
BMWM3Saloon
4人同跑
被譽為史上最辣BMW嘅M3Coupe雙門跑車，喺去年下半年已經登陸香港，點知廠方喺去年東京車展嗰陣，又幫佢出埋四門Saloon版。雖然兩者嘅外觀同機械配搭都係一樣，但始終多咗對尾門，後排亦因為咁而闊落咗，完全符合晒4人同跑嘅要求。
預計12月到港、約145萬
期待指數：★★★★
BMW1系Coupe
車壇小霸王
BMW1系一直都係以掀背車嘅Style示人，但早前廠方就幫佢推出加咗個尾廂嘅雙門Coupe版；新車個Look比原來嘅更加吸引之外，車廂陳設都係以Sporty為主，而最Top嘅135i型號仲配備咗3.0直6TwinTurbo引擎，馬力輸出可以去到306匹㖭！
預計9月到港、約60萬
期待指數：★★★★
VolkswagenEos
終有望到港
一直只聞樓梯響，唔見有車嚟嘅VolkswagenEos，相信喺今年終於有機會喺本港嘅路面上出現。同GolfGTI一樣，採用有200匹馬力輸出嘅Eos，車廂採用咗可容納4名乘客嘅闊落設計之外，廠方仲特別幫佢加咗個電摺硬頂，夠晒實用同有吸引力。
預計10月到港、約43萬
期待指數：★★★★
AudiA系
內外俱變實力增
眼見對手不斷變臉，Audi不得不為旗下嘅A4推出新一代版本。據聞搶先到港嘅新車，不僅由內到外都有頗多改動之餘，亦會以1.8公升直4TFSI引擎作骨幹，輸出馬力可以達160匹，另頂級版將配3.2V6FSI型號，馬力則為265匹。
預計2月到港、約35萬起
期待指數：★★★★
JaguarXF
英國紳士換新裝
推出多年嘅S-Type終退下火線，由全新XF車系取代。廠方將雙門Coupe跑車元素注入XF車系，令造型唔會再似S-Type咁成熟，藉此吸引車迷注意。入門版會以可輸出238匹馬力嘅3.0V6偈作核心，而頂級版本則會起用4.2V8自然吸氣引擎。
預計9月到港、約70萬起
期待指數：★★★★
Mercedes-BenzC-ClassEstate
尾廂大得嚇人
今代C-Class房車版大賣，連帶Estate旅行車版亦備受注目；由於車長同軸距分別增至4,596mm同2,760mm，因而令空間大幅增加，放低後排椅背仲可令尾廂暴升至1,500公升。機械配搭方面，頂級C350型號都係用3.5V6引擎，馬力272匹。
預計8月到港、約45萬起
期待指數：★★★★
