Mall明明讀「魔」！曾經留學英國的G.O.D.創辦人楊志超卻說英國口音應該讀做「貓」。其實玩粗口諧音又如何，我們小時候，這等字早已掛在嘴邊。面對無傷大雅的食字Humour，大家其實可以高抬貴手，放條生路畀本地創意工業唞啖新鮮空氣。如果商場真的會教壞學生，應該是無孔不入的消費主義。十隻手指一定有長短，當香港商場明明已經開到荼蘼，繼續倒模只會死路一條。最近上庭同入差館多過食飯的楊志超，卻選擇在有「銅記死位」之稱的怡和街開設全新概念「貓場」，希望腐朽終可變為神奇。
記者：梁敦濂
攝影：梁細權
「我破格係想贏！」
DelayNoMall前身為「豪華戲院」，近年一直人去樓空兼乏人問津，直至本身係G.O.D.顧客的大業主忽發奇想，期望楊志超接手將爛地變身為新派商場。「以前呢度係戲院，所以我想Keep番舊戲院嘅感覺。其實我一開始接呢個Project，就想件事好玩啲，Funky同Modern得嚟要有人情味，最好唔好咁容易畀人估到。而且呢度嘅Installation要活啲，經常有新嘢入，好似戲院咁經常換畫至有新鮮感，我要啲人Miss落咗畫嘅戲。」
男人有細藝
地下大堂的設計充滿70年代迷幻色彩，而且一入大門口就見到larger-than-life的機械人，令很多平時陪女朋友同老婆行商場的男性顧客都刮目相看，不停向做機械人Demo的靚女店員問長問短。男的有細藝，女人可以繼續血拼，好了，天下終於太平。「製作呢類Robots嘅公司叫做WowWee，係香港公司，成立咗超過20年。一直有做開製作PowerRangers呢類OEM生意，直至近年成功開發Robosapien同Roboreptile系列，只需幾百蚊就可以過足玩機械人嘅癮，好抵。」
店中店3個月換一次
第一個破格舉動，就係引入好多香港商場未敢使用嘅Concept，譬如Shop-in-Shop。「店內有店而不設走廊同櫥窗，就係希望顧客有投入感，同埋商戶之間嘅連貫性。每間舖都係互動，唔可以各自各，大家玩自己嘢，就同普通商場冇分別。」他揚言要打破商場悶局，DelayNoMall是新嘗試，更是必然的嘗試。「一般商場係靚、係大、係高、冷氣夠、名店多，但就真係間間都係咁上下，來來去去又係嗰啲舖頭，好似唔使行第二間。成個ShoppingAtmosphere好悶，我希望我哋做到AlwaysSurprising，啲客人會願意再返嚟Visit我哋覓驚喜。」
二樓店舖如Toywatch、MilkStand、Ka-pok同Cashemire等，均以短期租約形式生存，楊志超更會參與店內設計，務求令整層氣氛更統一。「3個月係一個Limit，之後又會有新嘢，所以只要有FinishedProduct嘅Designers都可以搵我傾，最緊要大家睇法相似。希望個Mall全面開放之後更成功。𠵱家？未得住！嘿嘿！」
DIY燈
荷蘭品牌Leitmotiv的獲獎吊燈，那些牛奶樽可自行更換，貫徹DIY精神。吊燈用四條粗身鐵鏈作懸掛，製作雖簡單卻見非凡創意。$2,200
中國風牛
產地香港的牛牌TheYearOf，旅居香港的紐約設計師TonyMagnetic，設計以玩中國生肖為主，用上日本的「鎖鏈線」技術縫製，質地與手工同樣上乘。傳統浪花Print$1,998
綠色膠袋
法國公司Ecoculture在香港推出的首個企劃「The091」，利用棄置商場膠Banner作材料，每個製品都是獨一無二。部份收入會撥歸環保團體之外，更希望顧客可以將破舊了的「The091」送返工場，將同一個袋裁細之後，製作出ToteBag及銀包等面積較小的產品，達成Recycle的環保理念。$780
有得睇有得瞓有得紋
「全面開放」DelayNoMall的５大概念：
1）個體睡床：「買入幾個NewYork做嘅SleepingPods，行到無力入去瞓一陣。唔使擔心，只有單人。」
2）旅遊書城：「香港人好鍾意自己去旅行。不過出面啲旅遊書唔夠豐富，上網啲料又未必可靠，所以我會開一個Travellers'BookStore。更會有大量Travel-Related嘅嘢，例如帽、Handbags及睡衣等等。」
3）紋身舖：「我阿媽都紋身，香港應該要興紋身。呢個TattooParlour會係半透明式運作，可以清楚望到TattooArtists做嘢嘅情況。」
4）展覽場館：「Art根本係文化一部份。我好想為香港Artists做啲嘢，所以會有呢個ArtGallery嘅Concept，行動藝術又好，裝置又好，總之越前衞越好，到時大家一齊玩。」
5）香港手信：「每件貨品背後都有故事，貨品絕不會熟口熟面，只要有特色有Message，就可以隨時買嚟做手信。」
街坊話過癮！
繪圖師Eric（34歲）
簡評：第一次行，幾特別，機械人好過癮，唔錯。
值幾多分：8/10
新加坡遊客Mr.Paul（36歲）
簡評：幾有趣，同新加坡好唔同。一個時裝商場有玩具同埋機械人賣，我覺得好滿意！
值幾多分：7/10
中學生阿鈞（15歲）
簡評：好貴，不過玩創意係咁㗎喇，機械人好正，行得都好舒服，會推薦畀啲Friend。
值幾多分：7.5/10
其他MustCheck產物
DelayNoMall（25776988）
地址：銅鑼灣怡和街68號