陳秀珠、薛家燕同秦沛近排忙於為無綫新劇《銀樓金粉》趕戲，秦沛喺新劇艷福無邊，共有四個老婆，包括大婆薛家燕、二奶陳秀珠、三奶伍詠薇同四奶胡定欣。陳秀珠上星期四喺將軍澳電視廣播城拍攝時發生意外，當日佢拍攝一幕俾秦沛家法侍候嘅戲份，秦沛大力推跌佢時，一位臨時演員上前扶佢，膝頭唔小心撞到陳秀珠背脊，傷及肋骨，陳秀珠即時倒地痛到郁唔到，要叫救護車送院接受治療。
「鬧人都冇氣」
醫生為陳秀珠照X光同檢查，初步估計係肋骨受傷，佢休息咗一晚就要求出院返屋企休養，由於佢肋骨疼痛，呼吸同講嘢都氣若游絲，所以暫停拍大動作嘅戲份。馮仁昭噚日打畀陳秀珠，佢話：「我係唞咗幾日，不過我唔想影響拍攝進度，大除夕嗰晚有場群戲，我返咗廠拍咗一場，𠵱家我肋骨位置仲係好痛，唔單止拎唔到重嘢，就連鬧人都冇氣。」
目睹整個過程嘅薛家燕噚日話：「當時我見陳秀珠跌咗喺地，但我仲要拍阻止秦沛出手嘅戲份，所以大家要停晒機先發現佢受傷。同劇演員個個都好關心佢，希望佢可以快啲冇事。」