近日經常孖咇夜蒲的賭王何鴻燊女兒何超盈和寇鴻萍女兒唐貝詩，前晚相約一班英國同學到寇鴻萍夫婦在山頂開設的餐廳開P，但山頂既大風又寒冷，二人卻抵冷穿單薄衣衫兼露腿，超盈提到新年願望時說：「希望爹哋身體健康，自己讀書再叻啲。」
「減到唔再麻麻哋」
日前賭王曾稱何家淑女都漂亮，惟獨超盈「麻麻哋」，她說：「家姐真係靚，呢個係事實，我唔會唔開心，爹哋個個讚靚唔合理，我覺得超儀最靚，Pansy（超瓊）都靚，但大家唔使比較。」
超盈和唐貝詩稍後將返英升學，超盈更誓言他日返港一定不會肥：「我會瘦，會同唐貝詩一齊減肥，我會食減肥餐單，減到滿意為止，減到唔再麻麻哋。」似暗寸賭王嫌她不夠靚。其後超盈和唐貝詩轉場蒲蘭桂坊，凌晨2時仍在老蘭蹓躂。
採訪、攝影：藍文浩、娛樂突發組