商台頒獎禮讓陳奕迅（Eason）成為大贏家，但他似乎對至尊歌曲落在張敬軒手中甚不滿，竟謂覺得十大不入、鄧麗欣的《電燈膽》才真正比其《Cryingintheparty》hit。
商台前晚在亞洲博覽館舉行的「07年度叱咤樂壇流行榜頒獎典禮」，張敬軒成績突飛猛進，除得至尊歌曲及男歌手銅獎外，連我最喜愛的歌曲大獎也捧走，他興奮得在慶功宴上滿場飛，到處向人敬酒，錫王菀之玉手，又再與歌迷開3支香檳自隊，比大贏家陳奕迅還要風騷。
意氣風發
自掏6萬宴請傳媒
軒仔前晚出席商台在紅磡舉行的慶功宴時意氣風發，他說：「好開心，之前話擺六圍請傳媒食飯，𠵱家要加budget，6,000蚊一圍要加到10,000蚊一圍先得呀。」他謂對得到至尊歌曲感意外：「之前話我首歌十大排第四，點知宣佈第四時唔係我，我已經謝咗好失落，到宣佈Eason第二時，側田拍一拍我話應該我攞第一，我真係估唔到，好開心，叱咤啲獎好難攞㗎，好多歌手坐幾年一個獎都攞唔到。」軒仔昨日凌晨2時出席慶功宴後，即被三部採訪車尾隨，他抵天后寓所後，落車時滿面風騷，任影唔嬲。
雖然陳奕迅得最多獎，但其大熱的《Cryingintheparty》卻輸給《酷愛》，得不到至尊歌曲，他似乎心有不甘並說：「我覺得今年真係hit嘅，hit過我首歌應該係《電燈膽》，啲fans話我知呢首歌好聽過我啲歌，我即刻去聽吓，真係幾好聽喎。」鄧麗欣（Stephy）的《電燈膽》大熱倒灶食白果，Eason說：「我首歌係好歌，但唱得多都冇新鮮感，反而覺得《電燈膽》好有新鮮感，《酷愛》都係好歌，節奏感好強，我唱唔切㗎。」問他的歌排第二是否感失望？Eason說：「我嚟嘅時候有人問我有冇信心得至尊歌曲，有都係多咗同作曲編曲上台啫，第幾位唔緊要，最緊要上台有得唱歌。」
Stephy昨日在將軍澳電視城出席活動，對於前晚被林海峰取笑唱歌走音，她說：「佢攞2012同2017呢兩個普選年份嚟講笑啫，佢平時啲talkshow都會攞人嚟講笑，事實上，我真係唔想大家重提走音。」Stephy後來在電話中談到Eason替她不值，她說：「好多謝佢，得到鼓勵好開心，07年有自己嘅代表作，有獎會開心，冇咪08年再努力囉。」
挑戰農夫
Twins出「術」爭獎
除了Eason說話酸溜溜，Twins慘敗給農夫也不是味兒，她們說：「要問吓佢哋係咪搵麥玲玲擺陣，我哋出年都要搵蘇民峰同白龍王先得。」農夫成員兼麥玲玲徒弟陸永得悉後笑說：「玲玲真係好掂㗎。」
此外，賽前有傳環球特別受商台厚愛，旗下歌手的歌曲例必熱播，結果環球真的奪11個大獎最風光，商台助理總經理甘菁菁說：「應贏就會贏，佢（環球高層黃劍濤）私底下係我老公，工作上佢係唱片公司嘅人，攞獎唔關老公事，播歌睇DJ，唔係我一個人話事。」黃劍濤則說：「歌手值唔值得攞係傳媒同觀眾決定。謝安琪得獎係公司部署得好。」
採訪：李珮洳、馬建華、駱華齡
攝影：葉君海、陳順禎、林德雄、黃文成
一網講盡：網友戥千嬅不值
叱咤樂壇頒獎禮前晚圓滿結束，各項大獎也塵埃落定。不過一如以往，網上有人在討論區留言力斥賽果不公，昨日本報又接獲多封讀者來信，指摘商台偏幫環球。
讀者X：有關「至尊大碟」由陳奕迅的《ListentoEasonChan》得到，903於07年12月不斷播放陳奕迅的《時代巨輪》，但古巨基的《十蚊雞流浪記》卻無理被903突然中斷播放……有造airplay的嫌疑！
豬朗拿度（香港討論區）：「陳柏宇叱咤樂壇生力軍男歌手食白果，佢三甲都入唔到真係好意外！」
lilily9394（香港討論區）：「千嬅又開演唱會，個謝安琪前半年生仔，之後先出番嚟唱嗰幾首歌。」（謝安琪奪得叱咤樂壇女歌手銅獎，楊千嬅三甲不入）
lowbjaii（Uwants討論區）：「雖然Stephy唱歌唔係話好好，但講歌曲hit嘅程度（指《電燈膽》），點都應該入到十大。」