港股呢兩日玩鋪假嘅，上禮拜五跌400幾點，昨日又升番400幾點，真係唔知搞邊科，不過，全年最後1個交易日，升番幾百點都係開心嘅事，今日係西曆年初一，預祝大家今年大有斬獲。
今年主攻地產股
07年港股係波動嘅1年，恒指升近4成，但好多股其實跌4成都唔只，恒指成份股嘅表現亦好參差，上半年「六行三保」裏面嘅恒指成份股好威，但下半年就走晒樣，好彩地產股生性，如果唔係恒指都唔知會收喺乜嘢位。今年會點？國內宏調措施相信會越嚟越辣，國企股都係睇定先，只可以炒個別，市場焦點會喺地產股，整個大形勢對地產股好有利，加埋大戶要托市要搵主力股份，「六行三保」靠唔住，其他股份又冇乜concept，好似滙控（005）咁仲有次按負面效應，唔搵地產股托市，都唔知搵乜。
雖然地產股波幅好大，但整體嘅吸引力唔細，今年嘅策略主攻地產股，喺低位有動靜炒上就偷步買啲，高位見搶得犀利就睇住食糊。至於話成個市點睇，今年應該係「動盪」嘅1年，大家炒賣要扣緊安全帶。
長實C輪3688：長實（001）昨收144.20元，升成5巴仙，半日成交嘅水平唔算低，如果花旗股市冇乜不利變化，假後應該可以繼續推高，炒上睇160元，可以買啲C輪3688短炒。隻輪昨收2.30元，槓桿率6.3倍（有效4.1倍），對冲值0.65，正股升上160元，3688應該唔會低過3.43元，正股跌穿137元止蝕。