南宋沉船「南海一號」最近喺大陸陽江重見天日，原來小小超、田二少等富豪名人嘅潛水教練、香港中國水下考古探索協會主席SteveChan陳來發，以及牙醫吳鴻春都有份出錢出力，佢哋共捐咗120萬支持呢項勘探工程，後來中國政府再出資400萬，前後用咗六、七年先完成。
拜天后娘娘先有發現
花咁多錢勘探，唔知Steve會唔會叫小小超出啲呢？佢同八方講，120萬對田少、小小超嚟講濕濕碎，點使勞煩佢哋，不過打撈完南海一號、仲有二號，或有三號、四號、五號都唔定，到時需要更多錢就可能要打佢哋主意。至於喺南海一號搵到嘅瓷器等物品，佢話最快都要今年10月公眾先有機會睇到。
Steve話打撈過程非常辛苦，好似大海撈針一樣咁難，落水潛到20米已經完全見唔到任何嘢，後來拜過天后娘娘先有突破性發現。佢仲講笑話，如果畀佢選擇多一次，一定唔再做。佢又話打撈隊伍喺2001年進入內地海域時曾經擺烏龍，試過唔記得辦出入境手續，更一度被內地海關扣查咗一日，最後搞到要喺珠海偷渡返香港㖭。