近期上市半新股當中，比亞廸電子（285）都算係其中一隻令市場大跌眼鏡嘅新股，雖然認購不足，但係上市短短6個交易日，就由開市嘅10.74元急升至昨日報收15.1元，升幅達到4成，雖然比唔上興業銅業（505），但係升幅唔比一啲超額認購嘅新股為差。
比亞廸電子炒得起，有專家認為係認購不足令保薦人被迫上身，可以炒貨源集中、炒供求，睇過興業銅業嘅例子，相信唔會有好多人對此解釋質疑。事實上，母公司比亞廸（1211）近幾個交易日僅在低位徘徊，令人對比亞廸電子炒啲乜更感奇怪，莫非分拆後母子股價關係真係咁疏離？
近日再有一間上市公司搞分拆，彩星集團（635）宣佈，落實分拆玩具業務到主板上市，以實物分派方式，當作中期股息分派，由於以介紹形式上市，故過程不涉招股集資。彩星集團會先削減股本，然後10合1，再於合股後1股派1股彩星玩具（869）。建議分派完成後，彩星集團仍持有彩星玩具五成半權益。
據彩星公告稱，今次分拆有助提升彩星玩具之業務形象，幫助鞏固主要特許權，以及為彩星玩具提供新資金來源機會等多個好處，而完成分拆後，彩星集團將集中從事物業投資、物業管理、物業相關業務及組合式投資等業務。
地產業務估值更清晰
即係話，彩星集團日後有可能改名做彩星地產、彩星物業、彩星控股……諸如此類。彩星玩具業務雖然截至6月底止仍有虧損，但可以透過分拆評估其價值及股東可以將之沽售套現，令集團地產業務估值更易計算，相信呢個至係分拆最大好處。至於母子嘅股價炒唔炒得起，則屬後話。