投資銀行大賓架黃桂林與太太慶祝結婚三十周年，在朗豪坊頂樓StarRoom擺十圍八圍自助餐，招待老友，因場地所限及唔想打攪太多人，賓架黃話好唔好意思，請冇收到請帖嘅老友多多包涵；呢晚賓架黃唔收人情，各賓客隨自己心意，事先寫番張支票捐畀新亞書院做訓練學生簡報技巧嘅經費。
是晚賓客之中，自然少不了朗豪坊揸弗人Adrian，朗豪坊屬鷹君所有，鷹君隻REIT上市，就係由賓架黃一手經辦，故此朗豪A與賓架W兩人熟過打band。當晚真係打band嘅，就係Jeffrey張慶，九鐵J本係地鐵財務高層，好多年前轉去九鐵做財務總監，現在九鐵與地鐵合併為港鐵，於是九鐵J變成港鐵J，重返九龍灣總部！J哥原來係夾band發燒友，領導一班三四十歲嘅世姪、老友打band，聽落仲勁過陳南祿隊國泰YoungOnce，兩隊如能在慈善籌款晚會上一較高下，一定轟動財經界。
左丁山唔識唱歌，商界好多朋友鍾意唱K，人人可以登台。先排收到周融送嘅CD，係佢自己拜師學藝經年，超出唱K水準之後，自費灌錄嘅一隻CD，畀自己作為一個紀念。周老闆話學咗唱歌之後，做節目、演講連續三至五小時都唔覺得喉亁聲沙，皆因懂得運氣也，佢話每一個靠把口搵食之人都應該跟師傅學唱歌，免傷聲帶喉嚨。
好嘞，既然有隊港鐵財務J率領嘅勁band壓陣，唱K勇士唔出場點對得住主人家賓架黃呀，如此場合，食飯其次，最緊要好玩，識得唱嘅就要唱，唔唱嘅就要跳舞！主人家一早在每枱安放粉色螢光棒、吹哨子，似足搞演唱會，在場人士有老有嫩，例如和黃集團高層Dominic哥與太太及千金到場，介紹之下，和黃D位千金就在美林服務，仲做正賓架黃個部門㖭，佢哋一家三口玩得唔知幾高興，跟住和黃大班霍與太太到場，與港大王副校長都唔知幾好傾，霍大班亦係打band高手，聽講新年會開party與老友jam歌，呢晚當係熱吓身先。