領導人鍾意題字，公民黨黨魁余若薇不免隨俗，為咗喺嚟緊嘅年宵攤位幫市民寫揮春籌款，余大狀特別跟細女凱琦個國畫老師林逸之學習書法，學咗一段日子終於有啲成績，下個月中會同其他同學喺中央圖書館舉行聯展。
林逸之老師有唔少名人學生，包括城大署理校長何炘基、合和胡應湘太太郭秀萍同香港DHL前老闆鍾普洋等，聯展名為「藝術拓荒者作品展2008」，睇落好悲凉。余大狀同八方講，第一次開展覽有啲緊張，擔心水準麻麻獻醜。佢話寫書法唔係寫遊行banner大字報，所以冇寫「2012雙普選」，多數係抄唐詩、宋詞，抒發吓情懷，亦有為佢細女畫作題字咁囉。