去年11.18區選紅人之一，應該包括喺選舉論壇中「一鳴驚人」，將辯駁精神發揮得淋漓盡致嘅黃大仙竹園北選區梁安琪，事關佢同對手社民連陶君行似拗交多過辯論嘅精采片段，熱爆YouTube，就算輸咗都算贏咗知名度。
八方查過佢嘅選舉開支，發現梁安琪用咗3萬2千幾蚊選舉經費，同其他直選候選人差唔多。但原來佢特別用咗千五蚊搞形象設計，唔知係設計論壇上嘅包拗頸image，定係法律行政人員嘅專業feel呢？原來前飲食名主持李錦聯都係挺梁派，捐咗2千蚊畀佢參選。
至於戰況最激烈嘅山頂區，落敗嘅自由黨林文傑用咗4萬蚊多啲，相反公民黨陳淑莊只係用咗3萬2千幾蚊就贏咗，抵好多喎。