又有電台節目遭廣管局勸喻，不過唔係因為講性，而係因為講股！話說9月22日香港電台第一台節目「投資新世代」，主持人講到天津及渤海地區嘅經濟發展時，爆咗句被廣管局形容為「極度惹人反感的用語」，結果俾市民投訴。該節目由人稱石Sir嘅股評人石鏡泉同鄺民彬主持，八方聽番港台網上錄音，粗口就聽唔到，只聽到石Sir越講越激氣，仲話股民唔做功課炒股係「抵你輸錢嘅！」會唔會係呢句說話刺激到聽眾呢？
另外新城娛樂台節目《開心大鬧鐘》嘅主持人，因為三次叫人喺馬路淋電油遭市民投訴，廣管局認為主持人做法不負責任，同樣發出勸喻。當日有主持人話薄扶林道附近夜間經常有人非法賽車好煩，於是另一位主持建議喺馬路淋電油。呢招真係好毒，難怪俾人投訴。