警隊「二哥」副處長馮兆元做埋今個星期就退休「咬長糧」。馮Sir當差30幾年，最彪炳一役係82年掌管特別罪案調查科時，親自帶隊去北角圍捕悍匪。當日佢同匪徒槍戰駁火，據講馮Sir更俾子彈擦傷塊面，名副其實險過剃頭，佢退休前接受傳媒訪問，卻自爆當時唔係咁驚險，澄清自己冇咁神勇。
馮Sir當時還火五槍係事實，不過佢受傷只係子彈射中牆壁反彈碎片所致，傷勢濕濕碎咁話，所以面上冇明顯疤痕。佢堅稱呢場槍戰唔係當差最難忘事件，有性格而且好「寸」咁講：「任內最難忘係退休。」
35年警察生涯，馮Sir做過刑偵同行動部門崗位，記者問佢有邊個崗位最想做，卻一直冇機會做，係咪「一哥」鄧竟成做過嘅飛虎隊呢？馮Sir反應好快，即時話：「你講㗎咋。」然後講咗個令人意外嘅答案。
頭三志願做水警
佢話喺學堂受訓後，出學堂前要填寫最想投身嘅單位，八方斷估佢唔想做「無間道」填卧底啩，佢透露頭三個最「恨」做嘅單位，其中一個係水警，不過咁多年嚟一直喺陸上辦案，冇機會下海坐艇做「水上人」，雖然唔能夠一圓呢個志願，八方聽馮Sir口氣卻冇乜遺憾感覺。
以前警隊係半軍事化紀律部隊，95年推行優質服務概念，強調係為市民「服務」嘅公僕，唔係高高在上。幾廿年前有人話「好仔唔當差」，馮Sir話要一個有幾萬人嘅部門改變既有文化，唔係一朝一夕嘅事，警隊高層初時向下屬提倡「健康生活模式」時就阻力重重，「同事以為講笑，惟有以身作則。」
請許鞍華做評判
警隊𠵱家每年舉行價值觀工作坊，今年主題緊跟中央，係「公正無私，和諧共事」，又舉辦防止投訴短片比賽，請到名導演許鞍華做評判。馮Sir認為呢啲事好緊要，對警隊發展影響深遠，「好似你叫人唔好講粗口，佢講完"Yes,Sir.Thankyou,Sir."就行咗去，咁冇意思。唔可以淨係罰，你要令佢認同真係唔啱先得。」有人歸故里，有人趕科場，馮Sir退休，新任副處長曾偉雄下星期履新，佢係下任「一哥」頂頭大熱。