菩提樹下齋戒誦經<br>馮仁昭四圍超:王菲隨印度法王修己過 - 馮仁昭

菩提樹下齋戒誦經
馮仁昭四圍超:王菲隨印度法王修己過 - 馮仁昭

王菲信奉大寶法王噶瑪巴多時,原來近日佢又去咗印度菩提迦耶,出席大寶法王主持、為期接近一星期嘅第二十五屆噶舉祈願大法會,同8,000幾位來自世界各地嘅善信一齊參與。向來我行我素嘅王菲絕冇明星派頭,同大部份信眾一樣,每日素顏、隨意打扮現身法會,誦經齋戒,聽法王講佛偈,相當虔誠。

劉嘉玲04年都有出席呂良偉同太太楊小娟,為第17世大寶法王籌款建寺廟嘅慈善晚宴。

大寶法王喺印度舉行祈願會,吸引幾千名信徒參與。互聯網圖片

每日聽經誦經

馮仁昭聽聞今次一眾信徒,大多時間都喺菩提樹下做法會。第一日舉行時,王菲同所有信眾都要清晨4點零鐘起身,然後去正覺大塔入席,等候法王到場誦經同指點信眾修持,觀察己過,盡力修正。聽完一輪佛偈後,王菲可以嘆個清淡早茶,跟住都係誦經、聽佛歌,再食午飯,當中都有唔少信眾堅持過午不吃,同老公李亞鵬試過喺重慶辟穀禁食15日調養身體嘅王菲,忍餓能力極強,唔知佢有冇參與埋過午不吃呢?
今次祈願會每日都有唔同嘅課程,王菲日日天未光就起身,一直聽經誦經到天黑,至幾日前至祈願完畢返北京。其實王菲對大寶法王確係非常信任,劉嘉玲都係王菲介紹,成為法王信眾,之前嘉玲同男友梁朝偉及台商郭台銘感情糾纏不清,仲專程飛去印度向法王問津,當正佢係生神仙膜拜。