潮流興瘦身，唔淨止藝人同埋OL，連英超球會熱刺都瘦埋一份。我求大俠最近八到，熱刺領隊拉莫斯上任之後，落「柯打」要班球員減肥。結果係點？佢哋咪喺14場攞咗9勝3和2負，其中前鋒貝碧托夫仲喺呢段期間入9球㖭！
拉莫斯喺10月尾上任成熱刺領隊後，見到班球員大部份都「豬圓肉潤」，真係眼都突埋，於是要佢助手兼體能教練艾維里斯為球員度身訂做減肥餐單同練習。我求大俠收到風，除咗兩個中場艾朗連儂同埋贊拿斯之外，其餘球員都要減磅，主力球員如羅賓遜、戴臣、侯度史東同埋貝碧托夫都走唔甩。
戴臣減肥減到扁頭痛
聽講負責守龍門嘅羅賓遜就減咗大約14磅，由原本嘅198磅減到得番184磅左右，雖則佢身手冇敏捷咗，但身形就係近幾年最「弗」同最靚。至於肥仔嘜中場侯度史東同原本都幾「弗」嘅前鋒貝碧托夫喺減磅之後，表現明顯好咗，侯度史東喺前一仗對富咸時，梅開二度幫球隊贏5:1，不知幾咁威；貝碧托夫仲勁，前晚對雷丁食鋪「大四喜」，協助球隊贏雷丁6:4，近12場入咗9球，睇嚟拉莫斯個瘦身計劃真係好幫到佢。
但唔係個個都頂得順，好似中堅戴臣咁，佢減肥搞到有扁頭痛，仲因為咁而要入醫院，真係得不償失。
除咗減肥，我求大俠認為拉莫斯仲應該幫班球員操吓射12碼。羅比堅尼之前對阿仙奴12碼宴客，搞到球隊以1:2敗走；前晚佢再次12碼唔入，好彩佢哋最後贏6:4，如果唔係隨時有球迷提早幫佢「開年」。