原來貴為天后的陳慧琳（Kelly）每次出埠旅行，跟普通的巿民一樣，喜歡掃平貨和品嚐美食，她至愛的旅遊熱點，也是港人外遊首選的日本。至於長線旅遊，她則愛到美加shopping，而她最難忘的，卻是在賭城玩跳樓機，既刺激又興奮。 撰文：比華利
陳慧琳認為日本東京距離香港僅3小時多的航程，就算只有短短幾天假期，也可隨時起行，兩地時差僅一小時，所以抵埗便可立即展開吃喝玩樂之旅。每次到東京，Kelly必定要去澀谷109朝聖，回想去年之旅，至今仍回味無窮，她說：「嗰度好多新潮時款靚衫賣，價錢唔會特別貴，我好鍾意去嗰度掃貨。其實日本嘅精品既靚又別致，設計可愛又新穎，真係會越買越開心。」不過，Kelly自問是個精明消費者，她絕不會瘋狂胡亂購物，只會挑選實用的東西，她說：「我買還買，絕對唔會失控，其實我都係慳妹。」
即嘆神戶牛柳
東京是一個方便的城巿，Kelly說：「購物商場好集中，行到攰又可以到咖啡店食件蛋糕唞吓，之後又再行過，好舒服。」
辛苦搵來志在食，美食當前，Kelly不但不孤寒，還十分闊綽，就算價格昂貴的神戶牛柳，她都不嫌貴：「我最鍾意神戶牛柳入口即溶嘅感覺，真係好回味。」Kelly享受侍應在面前即時炮製的服務，她說：「始終佢哋掌握時間好啲，我驚燒耐咗會嘥咗咁靚嘅牛肉，最好係即燒即食。」Kelly記得去年拉大隊與工作人員大快朵頤，埋單約4,000元，真的不便宜。
俯覽腳底夜景
不過，如果時間許可，Kelly也愛作長程旅行，她說：「最理想係去完美加做騷，順便可以留低shopping。」去年Kelly到拉斯維加斯登台，為了紓緩工作的緊張心情，完騷後她竟然並非返回下榻酒店休息，而是趕去Stratosphere酒店樓上玩跳樓機，認真貪玩，那是世界三大恐怖的跳樓機，最高會升至921呎，當被吊到漆黑半空之中，興奮的Kelly不時狂叫，正在地面替她拍照的助手都清楚聽到，Kelly說：「我吊到半空，可以望晒腳底嘅夜景，我好鍾意玩呢啲刺激遊戲，一啲都唔驚。」當然，到拉斯維加斯觀光，不要錯過看騷，她說：「我舊年睇咗索拉奇藝坊嘅《KA》同《O》呢兩個騷，精采到不得了。」
-美國篇-
話你知：維他命丸上倉
美國的維他命丸品質很有保障，陳慧琳每次到當地工作或旅遊，總會到藥店選購，她說：「食維他命丸可以補充身體缺乏嘅營養，美國某啲牌子價錢較平，我每次都會掃貨。」
話你知：食Cupcakes滋味
嗜甜的陳慧琳推介到洛杉磯一定要到Sprinkles餅店買Cupcakes吃，她說：「佢係一種蛋糕仔，好鬆化滋味，唔會太甜，入口好有口感，好食到唔停口，每個約十幾蚊港幣。」
-日本篇-
話你知：平價髮卷抵用
身為藝人很講究形象，陳慧琳直認自己是個貪靚的人，所以每次到日本旅行，必捐窿捐罅搜羅扮靚用品。她尤其緊張一頭秀髮，她說：「出席唔同場合，要set唔同鬈度，舊年去日本，我就買咗呢幾包髮卷，好好用，只係十幾蚊一包，勁抵。」
話你知：豬扒定食大份
陳慧琳一出埠放假就俾自己肚皮好大空間，她說：「去日本一定要食當地嘅豬扒定食，份量大唔在講，味道又好。」