今日是2008年第一天，踏入新一年，TVB韓語天后宋芝齡即公告新戀情，原來近日她正與一名比利時華僑商人蜜運，日前她更蹺實男友，拍拖遊老蘭、搭港鐵，平民但甜蜜。宋芝齡透露邂逅男友，緣自大家愛覓食而撻着，笑言：「食食吓，咁就拍拖啦！」
現年29歲的無綫韓語天后宋芝齡一年前甩拖後，感情一直未有着落，至近月再墮愛河，新歡是名從事貿易生意的比利時華僑商人，日前她拖着男友遊蘭桂坊，毫不介意公告戀情。
當日凌晨約12時，戴cap帽遮素顏、一身便裝的宋芝齡和男友拍拖現身老蘭街頭，其新歡年約30歲，身形圓潤，打扮隨意，二人拖手漫步，宋芝齡卻不時耷低頭，當行經皇后大道中等候過馬路時，由於市民甚多，宋芝齡即鬆手，男友則雙手插袋，四處張望視察環境。
甜蜜搭港鐵
及後宋芝齡又主動蹺着男友臂彎，齊齊步進中環港鐵站，但她依然保持警覺性，不是四圍望，就是頭耷耷，至入閘後才變得輕鬆。雖然拍拖節目平民，不過戀愛大過天的宋芝齡昨日接受訪問時，即甜絲絲直認正發展新戀情，她在電話中笑說：「佢係比利時華僑，返香港半年，係做貿易生意，我哋喺朋友嘅party認識。」
開韓語學校
最搞笑的是二人相識後，竟因同樣喜歡四圍覓食而撻着，宋芝齡說：「咁啱佢住喺我屋企附近，佢話得閒咪落嚟食吓嘢，食食吓，咁就拍拖啦。」她謂今年在事業上也有新發展，將與朋友合資開設韓語學校。
其實宋芝齡入行以來鮮有緋聞，05年9月本報曾拍得她與圈外男友在銅鑼灣吃平民燒味飯，男友更到她香閨過夜，不久二人掟煲，至今年2月她被拍到一連兩晚偕不同男伴夜蒲，且曾帶男伴返家。憑一口流利韓語上位的宋芝齡，隨去年韓風減褪台風熱吹，踏入08新一年，事業和感情也一併送舊迎新。
採訪、攝影：娛樂突發組、林妃
