聖誕前，中環人山人海，交通擠塞，過了聖誕，汽車走在路上，竟然通行無阻，大概不少上班人士齊齊放假，待明天（一月二日）先至返嚟搏殺。
餐廳羅例牌在新年前請食午飯，本來話去「車氏」，但遲遲未有訂位，於是訂唔到，成班人改去港麗酒店食西餐，餐廳內大把位，任坐唔嬲。問餐廳羅是否今年十分好景，佢話未必，蘭桂坊一帶，自十一月中至十二月中，營業額唔見得好過○六年，行外人過份樂觀而已，況且舖租上漲，食油、豬肉、牛肉價格無一不升，工人難請，做餐廳老闆十分頭痛。一位初級廚師，月薪萬二，澳門酒店以二萬五銀挖走咗；一位餐廳經理，月薪二萬五，澳門酒店以月薪三萬五加房租津貼搶，餐廳羅話本地食肆根本無法留人。
講起澳門，幾位老友都在聖誕前後過大海，試新酒店，人人都鬧澳門出入境關卡冇效率，費時失事，排隊排到腳軟，與香港移民局啲效率冇得比，跟住就鬧啲船，話點解開咗咁多間大酒店，竟然唔開多啲新嘅船公司？第三就係鬧交通，餐廳羅話佢見到市區一條的士龍有成四百人企喺度，睇見都冇晒心機。
故此公子Ｌ話住在「威尼斯人」唔方便，冇車出市區，只能困在氹仔，在酒店內行嚟行去。公子Ｌ話：「下次一定要住番永利，位處中心，可以周圍行街食翅，而且氣派豪華。」澳門以飛快速度增長，酒店賭場一擁而上，但其他交通配套，服務行業工人等，仍然滯後，於是遊客往往怨聲載道。澳門淨係得咁多人、咁多地，如何改善環境，有待第三屆特首諗辦法。
我地香港剛剛相反，大型建設一味得個講字，樣樣講幾年，到第四屆特首上任，都唔知會唔會見到啓德、西九、添馬艦政府總部落成。諗落都係領導人冇民意授權之過，假如特區特首係普選出嚟嘅，一個有擔當嘅特首大可以力排眾議，推動建設與環保，市民唔鍾意嘅話，咪五年一次選過另一位囉，𠵱家任何人做特首，都會畏首畏尾，照足劇本程序做諮詢，做完又揸唔定主意，驚有人示威絕食抗議，點搞呀。人大話會在2017普選特首，點解唔可以在2012呢？照曾鈺成文章分析，中央未肯定贏梗之時，唔會推行住嘅。