繼聖誕節時台灣幫包括棒棒堂同黑澀會美眉等嚟香港出席活動後，噚日又有另一位台灣人氣偶像賀軍翔（小美）來港，出席噚晚喺上水廣場舉行嘅除夕倒數活動，有指佢嘅倒數身價高達20萬港元。雖然係咁，但噚日接機嘅fans人數唔足100人，跟之前聖誕節來港嘅棒棒堂，佢哋嘅fans迫爆機場有明顯分別，但都有嚟自廣州、英國同澳洲等地嘅fans撐場。
匆忙返台拍劇
約下晝12點半，小美喺助手陪同下抵達機場，帶頭出閘嘅小美戴住墨鏡，頭戴冷帽，主辦單位工作人員隨即送上鮮花，8名保安即刻護住佢離開。小美表現親切，猛同fans握手，由於fans人數唔算多，所以冇混亂情況出現。當一行人準備落樓梯時，小美更溫柔咁對fans講：「要小心呀，不要跌倒。」
小美接受訪問時話係第一次來港做倒數活動，佢話：「是第一趟，所以好期待，不曉得別人報酬是多少，但能跟fans一起很高興。這一趟來港也很趕，明天就要返台灣趕拍劇集《鬥牛，要不要》。」