昨天同大家回顧過07潮界大事，新的一年，看08更緊要，今年有何重點潮流？即睇！
記者：梁敦濂、朱崇德
Model：QiaoQi@ModelGenesis
1.必Hit國產李寧牌
今年真係會興!話晒祖國第一次申奧成功，到時去到場館，見全場着住國產李寧牌一齊唱國歌睇升旗，呢種磅礡嘅愛國情懷，一定勝過聽五萬次《心繫家國》。一句到尾，十個牌子有九個係MadeinChina，無理由撐外國牌子而唔撐中國第一體育大牌──李寧牌啩！近年李寧無論製作品味同風格都逐漸擺脫娘味，又搵到奧尼爾做代言人，又同Kaws等潮牌玩交叉，唔睇Logo可能以為自己望緊嗰對係Nike﹗
2.高清燒錄大行其道
08高清廣播，今年影音產品完全俾HD牽住鼻子走！頭半年當大家搞掂機頂盒，預備睇首屆高清奧運時，大家可能會問：「可唔可以錄高清？」相信屆時醒目嘅國產品牌會搶先推出「燒錄式高清錄影機」。由於Blu-ray在香港發展較成熟及普及，加上一張BD-RDL上到50GB容量，會係一個唔錯媒體；更有可能者是配置Plugin硬碟功能，使容量更富彈性，加與不加豐儉由人。
3.TheTeenagers必爆
國際樂壇依舊一池死水，去年小爆的Mika未能做成Disco回歸，要求好像以往大爆一種音樂Genre的年代似乎又唔太可能。當然，這並不代表08年無嘢好聽。著名樂評人袁智聰推薦來自法國巴黎玩NuWave、PostPunk的𡃁仔BandTheTeenagers，受殘餘的80年代跳舞風影響，歌詞抵死好玩，風格盡見於透露少男懷春心情的新Single《StarlettJohansson》。
4.CarrieUnderwood走NorahJones舊路
NorahJones都威咗多年，今年終於有挑戰者出現！所講係05年出身《AmericanIdol》嘅CarrieUnderwood；首張大碟在美國已達600萬銷數，去年10月新推《CarnivalRide》首星期推出更高達100萬張雙白金，加上佢同走鄉謠歌手路線，樣靚、聲甜，而且自己仲識作曲作詞、彈結他，行內人都覺得佢差唔多走番NorahJones當年成名嘅同一條路，相信今年格林美獎都幾難走出佢手指罅！
5.Converse百周年
有幾可一個牌子可以享百歲壽命，仲要興完再興變咗日常生活一部份。由1908年由MarqiusConverse先生製作第一對Converse開始，幾年後已經過緊日賣四千對的風流日子，當然未將後來ChuckTaylor鞋款令Converse打入潮界計算在內。上日本官網已經搵到10大人氣百年鞋款，亦見百周年特別款陸陸續續登場，其實唔係百周年你一年都買幾對來襯衫啦，撞鬼。
6.Bike風吹
受奧運運動風潮、環保LOHAS族概念、以及㗎仔及台灣潮客相繼炒作之後，X-gear之風終於吹到本地。Oneway店長K話，自己近來也愛踩bike，在青山公路上練習時竟然見到一隊隊X-Bikers高速閃過，可見X-gear潮流將蔚然成風。當然，成個潮流唔會淨係圍繞踩bike，仲有玩改車，及隨之而來的BikingFashion元素（如緊身衫、吊腳褲等）更隨時出現潮牌設計上。當然，更時尚的做法是將時裝及運動推高至生活文化的層次。
7.色慾CocktailDress
本來08年一眾OL密切期待《SexandtheCity》，不過身邊朋友睇過Trailer後，無不黯然神傷，更係擔心都嚟唔切。連《LATimes》預貼08年每月票房冠軍之時，SATC更係三甲不入。話雖如此，SATC帶來的潮流將會限量復興，如劇中SarahJessicaParker的喪蒲戰衣CocktailDress，08年《Vogue》1月號已作優先介紹，着住去Semi-Formal的Function莊重有餘，就算去HappyHour亦不為過。
8.怪Cut怪膊
Ports1961副總經理NingLau：08年將會是興怪嘢嘅一年。「連TargetOL嘅旺角潮流舖都開始賣假Marni同假MiuMiu，個市場越來越接受新嘢。望埋條街度，啲人着衫真係靚咗。」既然一般市民接受能力高了，幾個大牌如MMM、Baleciaga同YSL等，紛紛於走偏鋒路線，玩怪膊，「圓膊、公主膊、甚至飛起嘅膊都有，總之個Shape怪就係In-Trend」。
9.姣藍、閃電藍
講過08年會興怪嘢，怪到一個地步，係你平時唔會試上身嘅顏色，今季大把牌子要你豁出去，仲要唔係一件兩件單品，而係全副武裝成身都係咁。呢隻色，哈哈，犀利喇，叫姣婆藍。「大路嘢好似FloralPattern呢啲費事講。08年大家要Bold啲，因為好多牌子都用上姣婆藍或者閃電藍。就算你由上身Jacket到下身Stockings同鞋都着姣婆藍，都絕對無問題，仲要係興㖭，而且同白白黃黃嘅亞洲人皮膚其實夾得好靚。」
10.紋身女KatVonD
惡女自立門戶的經典例子。TLC05年大熱紋身真人騷《MiamiLink》，故事圍繞顧客紋身背後的故事，再加插紋身舖老闆們的恩怨情仇。KatVonD原為MiamiLink旗下TattooArtist，上季被老闆逼走，跑到LA開舖頭，又開拍另一套爭飯食的真人騷《LALink》。KatVonD的《LALink》成為史上TLC最高收視的製作之一，即時宣佈開第二季。惡女吸引人是她的壞，敢愛敢恨又敢撇的聰明態度。
11.《長江7號》帶挈Figure
舊年套《變形金剛》連帶玩具一齊炒起！食住條水、今年玩具熱潮都係跟住電影走，好似近期熱戲《AVP2》、《投名狀》都有出12吋Figure，銷情？OK啦！不過自04年《功夫》後，農曆新年檔期上畫嘅《長江7號》，相信星爺又會帶起一個熱潮！據聞今次官方更突破傳統推出12吋Figure，分分鐘係根據星爺愛犬製作的外星寵物狗跑出，據聞貨量唔會太多。嚟緊仲有《Ironman》同《蝙蝠俠》，電影玩具今年真係出唔完。
12.《蝙蝠俠》香港始終有你
舊年蝙蝠俠影現香江！過萬對眼望住佢喺國金玩咗成個禮拜，究竟蝙蝠俠喺頂樓只係Un一Un，可以點跳落國金？從未現身嘅蝙蝠車，又會唔會喺中環飛馳呢？唔好話廣大市民，連電影圈內人都話睇完佢喺香港取景，都想知道後期Animation可以令畫面變化有幾大！其他08大戲仲有《奪寶奇兵4》同周杰倫《灌籃》等。
13.L變身爆粗BAND友
《爆粗BAND友》喺香港Hit爆，08年可能更上一層樓！除咗玉皇朝正式取得香港版權出書外，日本方面更在今年開拍成動畫同電影。當中值得注意係會搵嚟《死亡筆記》中飾演L，在港日同具人氣的松山研一作電影主角及動畫主角配音，相信電影、動畫可望年底前完成，香港漫畫迷絕對必睇！
14.iPhone港版變身3G
Apple部iPhone由話唔出、到水貨現身、到炒過萬元、到跌價又再反彈，喺07年可以話威咗成年。今年佢一樣將會成為潮人手機嘅指標，因為港版行貨終於問世！據先達整機天王謝利記表示，收到風港版iPhone為配合香港市場，會Upgrade上3G功能，可信度有七成之高，相信屆時會再牽起新一輪熱潮，而其他大牌子機，都會跟勢玩大Mon、TouchScreen，一於死跟！
15.癲喪眼鏡潮
07RayBan可謂一時無兩，至於08年方面，Oneway店長K話，自己睇好Eyewear繼續係大熱配搭單件，但更吹80年代風，就算興番RayBan都會係WayFarer變種，而且一些誇張到爆及闊膠邊的款式都會大行其道，來自澳洲的品牌AMEyewear、Ksubi更值得各界潮人參考。誇張眼鏡潮流，推波助瀾的有勁鍾意戴誇張眼鏡的潮流音樂人兼監製KanyeWest。
16.數碼電視玩到落PSP
好多人估XBOX360同NDS08公佈新主機，不過只算係每年的一個話題，睇趨勢睇熱潮始終會落番PSP之上！自從日本PSP於9月推出PSP-S310配件，只經USB駁上就可隨街睇高清廣播；礙於香港、日本高清廣播制式不同，原件引入不可能，但相信香港或國內第三廠商會出嚟做搞手！據知日本嗰邊大廈林立地區都收得好清，估計香港用都冇問題，預想價唔過$500，平過你買機頂盒。屆時外置式電池一定搶住買嚟煲電視。
17.鐵金剛車變凡間版
今年下半年推出的AstonMartinDBS將是期待之作，單睇《新鐵金剛智破皇家賭場》都要搵佢做Bond'sCar，就知佢來頭不少！車身配置的6,000ccV6引擎，是同廠所製落場賽車DBR9及DBRS9的同款，只是變為街車後將馬力由600匹微降為517匹，但仍能做出4.3秒/0-100kmh。其他配置仲有手工打造碳纖車身同可調式懸掛系統，成功將高速行駛、操控及穩定性達至平衡，預計車價在300-350萬港元。
18.高清多媒體狂冧
Blu-ray、HDDVD兩讀式光碟機（SuperMultiBlue）喺腦場都出咗一段日子，現時約價$1,680齋碟盤、廠機原套砌埋都係$8,000餘。不過預計暑假砌機大旺季，碟盤會下調至$600-$900低價位！相信會成為今後出機必附配備。加上電腦硬件價格下調，可望$4,000餘就砌到部「高清雙讀式」多媒體電腦！為配合高清「碟」播，24吋對應1080i/p嘅LCD將會一街都係。
19.單鏡機必玩LiveView
卡片機市場萎縮，睇SONYT2出到4GB內置雙天保至尊，就知玩到江郎才盡！DSLR今年一樣會成為出機熱選，FullFrame機仍然以上3萬元高價保住頂級機地位，當中值得留意者係EOS5D後繼機，廠名未定、網友已叫佢做6D甚或7D！具指標性除FullFrame外，同系列仲首度加入除塵同LiveView（用LCD睇住影）功能；相信來年DSLR都會以此兩項為基本配置功能。
20.SelectedShop型格百貨
07年有圓方，不過除了大，跟對面海國金相比其實是同一回事。08年商場有無新氣象？有，位於日本東京有樂町的丸井百貨，擁有嚴謹的商戶政策，入場商戶需為特別限定的品牌特賣店（SelectedShop），或當地Up&coming設計師/藝術家只此一家零售店。頂樓更有花道館、綠化區、運動場所，10月中開幕首日便已吸引超過12萬人次進場消費。本地樣辦留意楊志超打理的DelayNoMall。
