近排天水圍成為焦點，迷你版遊戲展搬入天水圍，阿姐演唱會又喺天水圍，連今晚倒數活動都有天水圍份。曾經喺天水圍做社工嘅邵家臻出咗本新書叫《天水‧違》，噚日佢喺新書發佈會度話，估唔到𠵱家「天水圍」呢三個字可以吸引到咁多人嘅目光。佢話自己七年前開始寫天水圍，最近先加速印製成書，內容分四部份，分別係鬧（包括政府）、讚（天水圍居民嘅精神）、嘆息同自醒。
早排發起單車遊行出市區嘅鍾婉儀同一位天恩邨嘅街坊陳先生到來撐場。鍾小姐話，十幾年前搬入天水圍時，嗰度可以叫做「李家城」，除咗公屋之外，大部份住宅同舖頭都係誠哥旗下集團嘅，後來先多咗西鐵同九巴。陳生就話喺天水圍住咗四年，其間佢條邨已經發生咗三單跳樓自殺事件。