社民連幾名成員前晚衝上禮賓府燒車胎，怒火冲天反映港人不滿北京處死2012雙普選嘅憤怒，堪稱近年最激烈示威行動，八方問過幾位「幕後黑手」，可以爆啲幕後花絮畀大家知。
據講燒車胎最先係由陶君行提出，因為唔激啲不足以表達港人憤怒，長毛卻好審慎，擔心燒車胎產生有毒黑煙，俾環保人士投訴。大家以為燒唔成，星期六下晝遊行期間，長毛卻忽然重提此事，其他社民連成員即時和應，有人去買電油做燃料，不過「主角」車胎卻要另想辦法張羅。
路邊發現廢棄車胎
都話成事在天，遊行期間竟然俾佢哋喺馬路邊執到條舊車胎，佢哋二話不說一於「廢物利用」。將車胎搬上禮賓府途中，警方已密切留意社民連舉動；現場消息話，陶君行擔心功虧一簣，決定一到場就點火，唔畀機會警方沒收車胎。
眾人叫嚷一輪，其中一名成員點火，但由於佢係初哥，竟然將電油淋喺紙上，激到陶君行彈起，「有乜理由唔淋喺條車胎上面？」八方聽聞原本由陳國樑點火，不過佢唔得閒。搵佢係因為回歸前佢有燒車胎反對臨立會經驗。警方見點起火頭方寸大亂，但原來禮賓府外面個更亭冇滅火筒，要去警車攞，結果俾社民連成功燒到車胎。