過埋聽日，07年就正式畫上句號，呢一年嘅香港車壇可以話好熱鬧，唔止賣車數目多過06年一截，新車到港嘅數目都係歷年最多，就連索價動輒過百萬嘅SuperCar亦紛紛湧至，當中又以身懷千匹馬力嘅BugattiVeyron16.4，同埋新一代戰神NissanGT-R至矚目，呢兩部可算07年日、歐嘅巔峯代表作，令車迷睇得好過癮！
記者：鄭達基
超跑湧港潮
港經濟重拾升軌，從而帶旺車市，各大代理亦睇準時機，入咗好多新車嚟香港，淨係大馬力嘅SuperCar已經多到有排數！
首先打開SuperCar湧港潮嘅肯定係AudiR8，呢部屬廠方第一次推出嘅SuperCar，憑住有型嘅賣相同超高性能表現，令唔少車迷着迷，車未到就已經將今年嘅Quota賣晒！跟住矚目登場嘅，就包括起用新引擎、令馬力暴升至420匹嘅BMWM3，仲有就係據傳車未到就已經收咗80張Order、交車都要交兩年嘅Ferrari430Scuderia。
不過，我諗最矚目都係擁有千匹馬力嘅BugattiVeyron16.4，同埋聖誕前夕抵港嘅NissanGT-R；前者不僅馬力輸出達1,001匹外，就連身價亦逾1千萬港元，但今年Quota仍然全數售罄！後者闊別車迷9年、被譽為戰神嘅GT-R不僅馬力輸出高達480匹，同時仲掀起咗一場水貨車行市場爭奪戰㖭！
闊別車迷9年嘅戰神NissanGT-R，喺今年聖誕前夕殺入香港。
（售價：$1,039,000起）
擁有420匹馬力嘅新一代BMWM3，成為車迷爭相搶購目標。
（售價：$1,368,000）
AudiR8一樣厲害，車未到港今年嘅Quota已經賣晒！
（售價：$1,821,000起）
視為街版F1嘅Ferrari430Scuderia，據聞代理已收到超過80張Order！
（售價：估計約$4,000,000）
身價過千萬港元嘅BugattiVeyron16.4，以其1,001匹馬力震撼車壇。
（售價：約$12,630,000，未連稅）
喜
齊辦車展Fans笑呵呵
以前港澳搞車展，多數係集團旗下代理品牌一齊做，但今年11月喺澳門威尼斯人會展中心舉行嘅澳門國際名車薈，同埋12月喺灣仔會展舉行嘅香港國際汽車展，就破天荒咁集合咗多個喺港澳兩地熱賣嘅品牌同場展出，熱鬧之餘更係近年少見。
Showroom紛搬竇
今年不論平價小車或貴價豪房，就連天價辣跑都一樣賣個滿堂紅，唔少代理更趁機擴充「版圖」，細屋搬大屋！最矚目嘅相信係Peugeot同Suzuki，事關佢哋喺荃灣嘅新Showroom不但比以前更大，仲創下樓上Showroom先河㖭。
混能車成大贏家
曾特首力谷「藍天行動」，其中一項就係寬減環保車首次登記稅30%；市場熱賣嘅MPV（如HondaStepwgn）和Hybrid混能車款（如LexusRX400h），因被評定為環保車款而變成大贏家，售出數字比先前多出一大截。曾特首更身體力行，嗱嗱聲入番部全新混能豪房LexusLS600hL嚟代步呢！
怒
油價喪升車界叫苦
國際油價日日攀升，話咁快就過咗94美元一桶，搞到油公司不斷加價，搞到汽油最平都要$14.7/L，同年初約$13.8相比差額達$0.9/L。車用石油氣仲誇張，由之前約$3.3/L，加到家陣接近$4.5/L，幅度幾近$1.2/L，搞到每日要揸住部石油氣的士或小巴搵食嘅司機大佬，扣埋車租成本之後，搵到嘅錢越來越少。
電子道路收費翻生
香港塞車情況越嚟越嚴重，搞到空氣變差，所以政府就着手研究電子道路收費系統，望減少塞車同改善空氣質素喎！吖，唔知班政府官員研究嗰陣，會唔會諗到咁做其實係治標唔治本，兼且只會將個問題搬咗去另一條免費嘅道路上面呢？
哀
市區車速日減
上個月運輸署剛發表研究報告，指市區內平均車速喺4年間不斷減慢，由02年24.9km/h減到06年24km/h，並指大幅增長嘅私家車係元兇。但查實路面經常修路，的士小巴私家車停喺禁區等客，唔知算唔算係幫兇呢？
樂
政府停車場減價
領匯嚷着要加停車場租金，搞到班車主遊行抗議；但另一邊嘅政府當局，就明白價高無人用嘅道理，將多個停車場收費調低，例如時租同日泊夜泊嘅收費，連中環呢啲商業區都有得減！
返內地快過經皇崗
回歸10年，本港與國內嘅交通日益頻繁，淨係單靠現有如皇崗同文錦渡嘅口岸過關，根本就係負荷過重；好在喺全新兼貫通屯門及深圳灣口岸嘅西部通道，終喺慶祝回歸10年嘅大日子通車，從此市民及貨物皆可經此往返中港兩地。
兩鐵合併減車費
九鐵同地鐵喺12月2日合併成為港鐵，肯定係市民大眾最關心嘅消息，事關部份車站嘅轉車閘會被拆走之外，最重要係車費即刻有得減，加加埋埋一年可以幫我哋個荷包慳唔少；不過，合併之後就多次出現閘機扣多車費嘅情況，聽落都真係幾諷刺！
