今日係大除夕，除舊迎新，唔少得梗係嚟個07大roundup。今年至in至潮至多散戶捧場嘅有兩大股神，sorry畢菲特冇份，李四叔同陸東兩個都係自己人，邊使吓吓搵來路貨。另外，各大傳媒都幫富豪計身家，排頭位都係嗰幾個，好彩都有靠將公司上市，一夜暴富嘅例子，大家至有夢發。除咗好事，一年中梗有𤓓事，3件𤓓事博你會心微笑，中伏千祈咪閉翳。
香港股神──李兆基
恒地（012）主席李兆基，有「香港股神」之稱。年初推介中國金融、能源同地產龍尾股，仲話恒指跌到18000點係撈底好時機，去到23000就應收手。今年4月，四叔將恒指目標調升至25000點以上，仲拎10億銀認購碧桂園（2007），如果當日有跟四叔一齊抽，今日至少賺六成。
8月中大奇迹日，四叔旗下投資旗艦兆基財經用咗20億銀入市掃國壽（2628）、神華（1088）同中國海外（688），神華當日收市只係報24.9蚊，到12月尾已經升到46.25銀。四叔多次入市，但冇公開實際買邊隻股同買幾多，華華只可以用佢咁多年認購嘅新股做參考，即使大市調整，佢手上咁多年認購番嚟冇沽過嘅股份，家陣賬面仍然賺380幾億銀。股神最新預測恒指明春見30000點，明秋先見33000點。
基金界股神──陸東
瑞銀香港研究、策略及產品部主管陸東同樣有基金界「股神」美譽，1月時預測恒指18000點抵買，仲睇好一眾地產股，如長實（001）同新地（016）。
不過，佢最技驚四座係今年多次準確預測股市走勢，2月12日出報告，認為有資金流出本港，恒指會調整1500點，翌日恒指就跌逾400點，跟手佢調高恒指預測話年底見23000。經典之作係10月31日，恒指收報31352點，陸東警告大市處於極昂貴水平，未來有機會大幅調整，回吐幅度更達3000至4000點，報告一出，9日內共跌4300跌，超額完成。
兩個禮拜後，見大市開始回穩，陸東將恒指明年目標由28000點調高至32000點，最樂觀目標係到42000點。佢仲推介4隻股份，分別係九倉（004）、中銀香港（2388）、大新金融（440）同裕元（551）。
07經典語錄
「唔排除個別銀行盈利減少，或見紅也不出奇，大家應該有心理準備。」
任志剛12月13日
「你哋跟唔跟隨便你，衰咗唔好賴我！」
李兆基11月22日
「我一直睇好，去到年底，恒指可以去到四萬點。」
何鴻燊11月17日
「每個人對市盈率高低有個人看法，我有朋友花數百萬買了一個明朝太監用過的馬桶。」
馬雲11月6日
「內地股市市盈率達50、60倍，絕對係泡沫，希望普羅大眾自己量力而為。」
李嘉誠5月17日
再創科網熱──馬雲
馬雲今年風頭一時無兩，一手湊大嘅阿里巴巴（1688），再創科網股神話，超額認購256倍，凍結資金達4475億銀，成為今年新股凍資王，首日上市股價急升1.9倍。上周五收市報27.45蚊，以馬雲直接持有的阿里巴巴計算，身家達88億銀。
雖然該股由39.95蚊高位回落三成一，但仍較招股價升1倍。現時阿里巴巴係大陸科網股一哥，市值高達1387億銀，排二、三位係美國掛牌嘅百度及騰訊（700），市值分別1048億銀同1000億銀。阿里巴巴亦係全球第五大科網股，僅次於雅虎日本，排首位則為Google，其次分別係eBay同雅虎。
新仙履奇緣──鄧耀
今年另一隻新股傳奇，就係5月上市嘅零售股百麗國際（1880），公開招股凍結資金達4464億銀，打破之前工行（1398）紀錄，法國名牌LVMH家族亦睇好入股，首日掛牌急升31%，股價11月最高曾見13蚊，以上周五收報11.46蚊計算，較招股價累升近八成五。
有高跟鞋大王之稱的主席鄧耀，手持的百麗股票市值達284億銀。
鄧耀靠節儉辛勤致富，由九龍城山寨廠，發展到中國最大女裝鞋零售商，造鞋建出千億王國，百麗現市值達967億元。
亞洲女首富──楊惠妍
年僅26歲、碧桂園太子女楊惠妍，代替已故華懋「小甜甜」龔如心，被《福布斯》選為亞洲女首富。佢係碧桂園最大股東，持有公司58.19%股權，個人身家高達847億銀。不過，上得《福布斯》富豪榜都難免受詛咒，碧桂園早排被指違規取地，搞到被國土資源部調查，加上大陸宏調壓力，碧桂園股價由9月嘅13.76蚊高位，下跌三成五，上周五收報8.9蚊，楊惠妍嘅身家蒸發460幾億銀。
有喜有悲3件𤓓事
英超夢碎──楊家誠
泓鋒國際（2309）主席楊家誠年中雄心壯志收購英超球會伯明翰，仲搵埋范志毅、麥馬拿文等著名球圈人士加入公司董事會，以證入主決心。不過，年尾前爛尾收場。
楊家誠買唔成伯明翰，分分鐘要損手，事關泓鋒6月買伯明翰用嘅2.33億銀，係由楊家誠免息借出，批股份賣番出去隨時唔值2億銀。至於泓鋒股價由4月兩毫子炒到7月高見2.05蚊，不過之後無以為繼，上周五收報0.31蚊。
據聯交所資料，楊家誠9月底揸住1.25億股泓鋒，𠵱家市值3875萬銀，比高位蒸發兩億幾銀。
神華神話──瑞銀
瑞銀分析員GheePeh同WeiOuyang喺10月中，話神華當時個價未反映內地煤炭價格走勢，所以將神華目標價由35.15蚊大幅調高到101蚊，震撼投資界。不過，11月底就急轉軚，話用番市場普遍計算煤炭股嘅方法計，要將神華目標價調低番去76.64蚊。
瑞銀份「神華101」報告，雖然對神華股價有短暫刺激作用，但未見過101蚊，隻股上周五收46.25蚊，神話未見，美林、里昂等外資大行唔畀面落井下石，令瑞銀成為近月投資界笑柄。
大熱倒灶──中外運航運
今年新股熱，累散戶輸錢嘅新股唔係幾多隻，但大熱中外運航運（368）偏偏係其中一隻，令22萬散戶跌眼鏡。首日上市已經「觸礁沉船」，股價跌穿8.18蚊招股價，報7.12蚊，跌13%。之後，股價屢創新低，好似鐵達尼號咁，至今未曾「浮」出過水面，12月中曾低見5.61蚊，上周收報6.36蚊，較招股價下挫兩成二。中外運航運董事長趙滬湘真係要諗諗計，散戶投資嘅係隻識運貨嘅貨船，唔係潛艇。
電郵：mailto:[email protected]
