今日係2007年最後一日，八方諗住同大家一齊盤點吓過去一年，有幸（或不幸）喺〈隔牆有耳〉版出現過嘅各方人物，為迎接新一年做好準備。喺冇核數師公證下，八方好辛苦咁計過數，發現2007年登上頭條最多嘅係……煲呔曾蔭權，總共有成43次咁多，遠遠拋離排第二、三嘅葉劉同陳太，但當中有33次係「負面報道」，只有10次係讚佢醒。
煲呔攞全年𤓓爆獎
今年煲呔實在𤓓爆，遠嘅唔講，淨係最近幾個月已經連環失言或失儀，「極端民主=文革」論固然離晒譜，聽到陳太個名腳仔軟又笑死人，早排見廣東省委書記張德江時懶醒咁恭喜對方升官，犯咗內地官場禁忌，搞到對方即時黑面，亦絕對失禮人。要數佢最唔掂嘅，就當然係又話要玩鋪勁，但結果不但2012冇普選，仲連增加直選議席比例都爭取唔到。
排第二嘅葉劉向來係話題女王，今年共有21次成為頭條主角。好似選舉期間，喺唐唐號召下，佢獲得多位局長厚待接見，八方為配合呢個主題而設計嘅局長啦啦隊圖片，仲被網友擺上YouTube惡搞㖭。另外，好似ChanLeftEar、永左旅遊、袋巾洛奇上身、田少變成紋身惡漢，同埋煲呔死而後已思考圈呢幾單嘢嘅ideas，都得到唔少讀者同網友嘅迴響，真係多謝晒各位咁支持。
上得八方咩人都有
喺度出現嘅唔只華人，仲有外國人，好似肥彭、約旦公主Haya同麥卡倫；唔只大人，仲有細路，年紀最細嘅係9歲嘅數學神童沈詩鈞；亦唔只人類，仲有動物，講緊嘅係盈盈樂樂呢兩隻嘢；唔只生物，仲有死物，包括今日重開嘅昂坪「衫碌拎」、清明上河圖同威尼斯人度假村。
2008會係好忙碌嘅一年，又台灣選舉，又北京奧運，又立法會選舉，年尾仲有美國大選，香港同世界都有好多嘢發生。八方向來報憂亦報喜，希望各路人馬喺新一年表現好啲，爭取上鏡，話唔定成為出年「見八方率」龍虎榜之冠，頒個獎過你都唔出奇。
八方喺度祝各位讀者2008更進步，仲有，香港早日落實普選。